TAGBILARAN CITY, Bohol, August 1 (PIA) -- Gitahasan ni Presidente Ferdinand "Bongbong" Marcos Jr., (PBBM) ang Department of Tourism ug Department of Public Works and Highways sa pagtambabayong aron himoong hanoy ang pagbyahe sa mga turista ngadto sa mga hilit nga lugar nga gibuksan alang sa mga turista.

Didto sa iyang labing una nga State of the Nation Address (SONA) didto sa Batasang Pambansa Hulyo 25, gipadayag sa anak sa kanhi presidente nga kinahanglan gayud nga himoan sa mga batakan nga kaugmaran sama sa pagpakutay sa mga dalan aron mapasayon ang pagsulod ngadto sa mga tourism spots.

Magpa-upgrade usab sa mga tugpahahan ug magpabarug og dugang international airports aron maluagan ang naghuot nga Manila Airport, matud sa Presidente.

Niining tanan, mahimo na nga mas hamogaway sa mga ningbyahe ang pagsuroy libot sa nasud , bisan na sa mga hilit nga lugar aron ikapakita ang mga tourist spots nga wala pa mapasundayag sa kadaghanan.

"This program will be led by the Department of Tourism, together with the Department of Public Works and Highways," saysay sa Presidente kinsa miani og daghang pakpak sa iyang gilitok.

Sama saka bantugan sa mga Bol-anon sa pag-abi-abi sa mga bisita, giila usab ang Pinoy nga usa ka maayo nga brand, dugang niya.

"As for the Filipino brand, ours is deeply rooted in our rich cultural heritage and the tourism sector plays an invaluable role in the promotion of the Filipino brand."

Kini nga kinaiya nakita-an na nga usa  ka alas sa turismo.

Ug dayag sa Presidente, ang turismo dili lamang mahinongdanon nga agi-anan sa pag-ugmad, apan sa ang daghan nga kahigayunan nga iyang mabuksan ilabi na sa pagpasugod og mga panginabuhian ilabi na sa mga kabarangayan, dili gyud mahimong hikalimtan.

Ug aron sa pagpakayab sa kinaiyang garbo sa mga Pilipino, kinahanglang kini kahatagan og kahigayunan nga ikapadayag kay ang kinaiyang Pilipinhon, talagsaon, makapaagni ug mamugnaon, saysay niya.

Dugang sa president, ang pagkamaugnaon sa Pinoy, dili hingtupngan.

Hawod kita sa arte ug kultura, new media, pasundayag — kini mga agi-anan nga makapasugod og mga daghang trabaho alang sa atong mga may abilidad ug mamugnaon nga kaigsoonan, apan, subo nga kini nga mga kapanarbahona, ang unang naapektoah sa pandemya, ug possible nga labing uwahing mahibalik sa normal. 

Ang industriya sa pagkamamugnaon usab , nagsagubang sa daghang hagit lakip na ang kahimtang sa mga panarbahoan, oras sa trabaho, pag-ilog sa mga katungod sa orihinal nga mugna, u gang mga katungod sa mga wala’y amo nga nabiyaan nga nasuyop sa lilo sa kalisud niadtong panahon sa pandemya.

Aron kini sila kapanalipdan sa mga hulga nga magpapas sa ilang kapanginabuhian, misugyot ang pangulo nga mugnaon ang napahimutang sa institusyon nga creative industry nga maoy mopaasdang sa interes sa mga nanginabuhi dinhi, kay, kon hunahunaon, matud pa ni Marcos, sila ang naghatag sa kalag ug pag-ila sa atong pagka Pinoy, mao nga kinahanglang panalipdan nato sila, paambit sa panahom niya. (RAHC/PIA7 Bohol)