TAGBILARAN CITY, Bohol, August 9 (PIA) -- Gipahinumdoman sa Department of Education (DepEd)  ang mga school head nga walay angay mangolekta og salapi gikan sa mga ginikanan o stakeholder sa pagpahigayon sa Brigada Eskwela karong tuiga.

Gihimo sa DepEd ang pahayag isip tubag sa mga nataho nga may pipila ka mga magtutudlo ang giiingong nangayo og mga materyales sama sa pintura aron tarungon ang mga lawak-tunghaan sa dili pa magsugod ang pagpadayon sa personal nga klase sa Agosto 22.

“School heads are reminded that in the implementation of 2022 Brigada Eskwela (BE), no fee shall be collected from parents/guardians or solicited from other volunteers and stakeholders, based on DepEd Order No. 062, s. 2022 (Gipahinumduman ang mga school heads nga sa pagpatuman sa 2022 Brigada Eskwela (BE), walay bayad nga kolektahon gikan sa mga ginikanan/guardian o pangayoon sa ubang mga volunteers ug stakeholders, base sa DepEd Order No. 062, s. 2022),” matud pa sa gipagawas nga pahayag sa buhatan.

Matud pa sa DepEd nga tubagon sa Brigada Eskwela ang learning resource gaps o mga kal-ang sa kapanguhaan sa pagkat-on alang sa mga magtutudlo ug estudyante pinaagi sa pagpakusog sa partnership sa lokal ug nasudnon nga lebel.

“Ang Brigada Eskwela ay nakaangkla sa diwa ng ‘bayanihan’ at naging prime mover ng volunteerism at community involvement sa DepEd,” dugang pahayag sa departamento.

Niadtong Agosto 1, opisyal nga gisugdan sa DepEd ang nationwide Brigada Eskwela alang sa School Year 2022-2023. Kining inisyatiba kasagarang naglambigit sa pagppanglimpyo, pagpamintal og balik ug paghimo sa mga kinahanglang pagpaayo sa mga pampublikong tunghaan aron maandam kini sa dili pa magbukas og balik ang  mga klase.

Dinhi sa lalawigan sa Bohol, ang kick-off ceremony sa Brigada Eskwela ipahigayon sa lungsod sa Ubay sa Miyerkoles, Agosto 10, 2022.  (ECB/PIA7 Bohol)