LUNGSOD QUEZON (PIA) -- Tiniyak ng Kalihim sa Pananalapi na si Benjamin Diokno na nananatili ang pambansang utang sa antas na mapapamahalaan at pinawi ang pangamba ng mga senador na ang bansa ay hindi nakakabayad sa mga utang nito sa gitna ng bahagyang pagtaas ng debt-to-gross domestic product (GDP) ratio.

Ang pahayag ni Diokno ay bilang tugon kay Senate Committee on Ways and Means Chairperson Sherwin Gatchalian, na humingi ng katiyakan na ang bansa ay hindi magiging katulad ng Sri Lanka na kamakailan ay hindi nagbayad ng utang at nagdeklarang na-bankrupt.

"I can assure you, your Honor, that we won't go the Sri Lanka way. We're very careful with our borrowings. In fact, as [Treasurer Rosalia De Leon] said, I think most of our debt is long term [Former Finance Secretary Carlos Domniguez] has been very good in making sure that we borrow at the lowest possible interest rate and it is spread out (Matitiyak ko, your Honor, na hindi tayo magiging gaya ng Sri Lanka. Maingat tayo sa ating mga pangungutang. Sa katotohanan, gaya ng sinabi ni [Treasurer Rosalia De Leon], palagay ko lahat halos ng ating pagkakautang ay long term, Ang [Dating Kalihim ng Pananalapi na si Carlos Domniguez] ay napakahusay sa pagtiyak na tayo ay umutang sa pinaka mababang posibleng interes at ito ay nakakalat)," ani Diokno noong nitong nagdaang organizational briefing sa harap ng Senate Committee on Ways and Means.

Sa pagtatapos ng Hunyo 2022, ang pambansang utang ng pamahalaan ay umabot sa P12.79 trilyon, katumbas ng 62.1 porsiyento ng GDP. 

Sa ilalim ng Medium-Term Fiscal Framework (MTFF) ng administrasyong Marcos, layunin ng pamahalaan na ibaba ang debt-to-GDP ratio ng bansa sa mas mababa sa 60 porsiyento pagsapit ng 2025, at bawasan ang deficit-to-GDP ratio mula sa kasalukuyang 6.5 porsiyento patungo sa 3.0 porsyento sa 2028.

“The implication is clear: we do not have to borrow as much as we did during the crisis years (Malinaw ang implikasyon: hindi na natin kailangang mangutang gaya ng ginawa natin noong mga taon ng krisis),” ani Diokno.

Samantala sinabi ni Diokno sa briefing na ang maingat na diskarte sa pamamahala ng utang ng gobyerno ay nagbigay-daan sa bansa na mapangalagaan ang kanilang mga sovereign ratings sa gitna ng paglaki ng mga downgrade.

Nauna nang nagpahayag ng kumpiyansa si Diokno na walang mga pagbaba sa credit rating ng bansa, dahil ang administrasyong Marcos ay gumawa ng isang komprehensibong plano sa ekonomiya na magpapalakas ng kumpiyansa ng mga mamumuhunan at matitiyak ang mabilis na usad upang maka bawi.

Binanggit niya na sa kabila ng dalawang taong pandemya, pinagtibay ng mga rating agencies ang investment grade rating ng bansa, habang ibinababa ang rating ng halos karamihan ng mga umuusbong na ekonomiya at maging ang ilang mauunlad na bansa.

Sinabi rin ni Diokno sa mga senador na ang pinahusay na sistema ng buwis na pinasimulan ng administrasyong Duterte ay nagbigay katiyakan na matutugunan ng gobyerno ang mga obligasyon nito. (PIA-NCR)