TAGBILARAN CITY, Bohol, August 19 (PIA) -- Ang kagamhanang probinsyal sa Bohol nipahibalo nga dugang cash assistance ang ihatag alang sa mga biktima sa bagyong Odette kansang mga panimalay hingpit nga nangaguba atol sa pagkusokuso ni Odette.

Gipahibalo kini ni Provincial Administrator Aster Caberte atol sa programa sa kagamhanang probinsyal nga Capitol Reports niadtong Biyernes, Agosto 19.

Matud pa ni Caberte nga ang Department of Social Welfare and Development (DSWD) mipasalig nga ang National Housing Authority (NHA) mohatag og dugang P5,000 aron makompleto ang P10,000 nga cash assistance alang sa totally damaged nga mga panimalay nga naguba sa bagyong Odette.

Giklaro sa Provincial Administrator nga P5,000 lang ang kantidad nga madawat isip dugang sa inisyal nga P5,000 nga gihatag sa DSWD.

Gipahibalo usab ni Caberte nga kini ipangapod-apod sa higayon nga ma-download na sa Department of Budget and Management (DBM) ang ikaduhang tranche.

Gikusokuso sa bagyong Odette ang lalawigan sa Bohol niadtong Disyembre 16, 2021.

Giguba niini ang mga balay ug imprastraktura ug mikalas og labing menos 100 ka kinabuhi. (ECB/PIA7 Bohol)