TAGBILARAN CITY, Bohol, August 18 (PIA) -- Gi-awhag sa Philippine Coconut Authority (PCA) ang mga mag-uuma og lubi sa lalawigan sa Bohol ilabi na ang mga naapektuhan sa bagyong Odette sa pagpa-miyembro sa mga kooperatiba ug asosasyon sa mga mag-uuma aron madugangan ang ilang produktibidad ug kita.
Gihimo sa PCA ang pag-awhag sa mga mag-uuma og lubi atol sa paglusad sa Coconut Farmers Industry Development Plan (CFIDP) sa Bohol Cultural Center sa syudad sa Tagbilaran niadtong Agosto 17.
Ang maong kalihokan gitambayayongan sa Kagamhanang Probinsiyal sa Bohol, Agricultural Training Institute (ATI) Rehiyon VII ug PCA.
Gilagdaan ni kanhi presidente Rodrigo Roa Duterte niadtong Pebrero 26, 2021 ang Republic Act No. 11524 o ang Coconut Farmers and Industry Trust Fund (CFITF) Act.
Kining programa nagtinguha nga madugangan ang produktibidad ug kita sa mga mag-uuma sa lubi.
Si PCA Administrator Benjamin Madrigal Jr., miingon nga ang panagtapok niadtong Miyerkules uban sa mga mag-uuma, 14 ka mga representante sa Coconut Farmers and Industry Development Plan (CFIDP) ug stakeholders gituyo aron mahatagan og bug-os nga panglantaw sa komprehensibong pakete sa mga benepisyo sa mga mag-uuma sa lubi. , lakip ang mga interbensyon sa sosyal ug produksiyon ug pagsugod sa rehabilitasyon ug pag-uswag sa industriya sa lubi.
“All programs should be accessible to all our farmers,” matod pa ni Madrigal sa mga nitambong sa paglusad sa CFIDP diin ang ubang mga partisipante misalmot online.
Sa Bohol, halos katunga sa 6.7 milyones ka punoan sa lubi ang nangatumba sa pagpanghasi sa Bagyong Odette niadtong Disyembre 16, 2021.
Hingusgan sa PCA ang pagpananom og lubi sa umaabot nga mga buwan aron ilisan ang 3.1 milyones ka punoan sa lubi nga natumba sa bagyo.
Samtang ang Kagamhanang Probinsiyal sa Bohol sa pagpanguna ni Gob. Erico Aristotle “Aris” Aumentado mang-hire og 38 ka mga agriculturists aron moabag sa PCA alang sa pagpatuman sa maong programa.
Gisaulog karong semanaha ang ika-36 nga National Coconut Week nga nagdala sa tema nga: “Masaganang Niyugan: Katuwang tungo sa Maunlad na Kinabukasan.” (ECB/PIA7 Bohol)
