LUNGSOD QUEZON (PIA) – Bilang pakikiisa sa tema ng ASEAN Day ngayong taon na “Malakas kung Magkakasama” (Stronger Together), nagtipon-tipon ang mga ambassador, executive, at mga opisyal na kumakatawan sa ASEAN Member States (AMS), Department of Foreign Affairs (DFA), University of the Philippines Los Baños (UPLB), at ASEAN Center for Biodiversity (ACB) para sa isang tree planting at family day activity upang lumagda sa isang pangako ng sabayang pagkilos para sa ecosystem restoration na nagtataguyod ng magandang hinaharap para sa kapaligiran sa rehiyon.

Sa pagdiriwang ng ika-55 anibersaryo ng pagkakatatag ng ASEAN, ang DFA at ang ACB ay magkatuwang na nag-organisa ng aktibidad sa paggunita sa punong-tanggapan ng ACB at sa kampus ng UPLB noong 20 Agosto 2022.

Ibinahagi ni DFA Assistant Secretary for ASEAN Affairs Daniel Espiritu na ang mga prayoridad ng ASEAN ay hindi na limitado sa joint political security at economic cooperation. “Pinalawak na ng ASEAN ang mga paksa na binibigyang pansin nito sa mga di-tradisyonal na isyu gaya ng seguridad, kabilang na ang kapaligiran,” aniya sa kanyang pangunahing mensahe.

Pinuri ni Espiritu ang ACB, ang nag-iisang ASEAN center na pinamumunuan ng Pilipinas, para sa patuloy na pagpapakita ng pangako ng ASEAN sa kapaligiran, biodiversity, at sustainable development, at hinikayat ang AMS na patuloy na suportahan ang ACB sa pagsasakatuparan ng mandato nito.

Sa kanyang malugod na talumpati, pinasalamatan naman ni Dr. Theresa Mundita Lim, executive director ng ACB ang mga lider ng ASEAN na patuloy na sumusuporta sa ACB bilang regional hub para sa biodiversity sa ASEAN.

Ang mga ambassador at charge d’affaires ng ASEAN, kasama si Asec. Espiritu, Dr. Lim, at UPLB Chancellor Jose V. Camacho, Jr., ay nagtanim ng pitong native at endemic tree species sa kahabaan ng punong-tanggapan ng ACB na matatagpuan sa Mount Makiling Forest Reserve, isang ASEAN Heritage Park.

Kasama sa mga species ng puno ang kalunti (Shorea hopeifolia), makapal na dahon narig (Vatica pachyphylla), yakal-yamban (Shorea falciferoides), malawak na dahon na apitong (Dipterocarpus kunstleri), yakal-saplungan (Hopea plagata), malakatmon (Dillenia luzoniensis), at katmon (Dillenia philippinensis).

Ibinahagi ni Dr. Lim na ang lokasyon at ang species para sa tree growing event ay estratehikong pinili upang magsilbing proteksyon para sa dalawang puting lauan (Shorea contorta) na puno sa tabi ng punong-tanggapan ng ACB.

"One or two trees alongside each other are not enough to protect themselves from falling down when a strong wind or storm comes. I believe this is like ASEAN. If there are ten AMS standing together, we are stronger—strong enough to protect our region’s biodiversity from challenges and threats (Ang isa o dalawang puno sa tabi ng isa't isa ay hindi sapat upang maprotektahan ang kanilang mga sarili mula sa pagbagsak kapag dumating ang isang malakas na hangin o bagyo. Naniniwala ako na ito ay tulad ng ASEAN. Kung mayroong sampung AMS na magkakasamang nakatayo, tayo ay mas malakas—sapat na malakas para protektahan ang biodiversity ng ating rehiyon mula sa mga hamon at banta),” pagbibigay-diin ni Dr. Lim.

Ang tree planting activity na ito ay naaayon sa patuloy na flagship program ng ASEAN, ang ASEAN Green Initiative (AGI) na naglalayong hikayatin ang pagtatanim ng hindi bababa sa 10 milyong katutubong puno sa 10 ASEAN Member States sa loob ng 10 taon, na tugon sa UN Decade of Ecosystem Restoration. Ang AGI, isang pamamaraan ng pagkilala para sa nakaraan at patuloy na mga hakbangin sa pagpapatubo ng puno sa rehiyon na ipinatutupad ng ACB.

Ang aktibidad ay isinagawa kasabay ng mga masayang pag-aaral sa biodiversity na idinisenyo para sa mga pamilya ng mga dumalo na executive at dignitaries ng ASEAN. Kinilala ni ASEAN Secretary-General Dato Lim Jock Hoi isang recorded na mensahe ang kahalagahan ng pagpapataas ng kamalayan sa mga pamilya at kabataan ng ASEAN at halaga ng pagpapanatili ng paggamit at pag-iingat ng mga likas na yaman ng rehiyon.

Ilan sa mga naging highlight ng learning event ay biodiversity storytelling, interactive na laro, at science experiments.

Ang kaganapan ay nilahukan ng mga pinuno at kinatawan ng mga embahada ng Brunei Darussalam, Cambodia, Indonesia, Lao PDR, Malaysia, Myanmar, Singapore, Thailand, at Viet Nam sa Pilipinas. (PIA-NCR)