TAGBILARAN CITY, Bohol, August 22 (PIA) -- Ayaw na og paabuta nga mabisitahan sa mga tinugyanan sa Social Security System (SSS) Run After Contribution Evaders (RACE) team kay mahimong ma-ulawan nahinuon kon makit-an sa mga customer ug kliyente.
Kini samtang sa miaging semana, mingsakdap ang bahan sa SSS RACE Team pinangulohan ni Vice President sa Visayas Atty. Alberto Montalbo ug SSS legal department chief Atty. Marie Ann Chavez sa walo ka mga establisemento apil ang usa ka eskwelahan ug pito ka mga resort kinsa nakaykayan sa SSS nga wala magparehistro ug wala magbayad sa ilang kontribusyon sa SSS.
Sa pagbisita, giitunol sa SSS RACE Team ngadto sa mga nasakpan ang ultimatum nga 15 ka adlaw aron makapalimpyo sa ilang records sa SSS, sa dili pa ipasaka sa ahensya ang kaso batok sa mga malapason.
Kahinumduman nga niadtong miaging tuig, tulo sa mga nadakpan sa SSS Race Team, tulo na ka eatablisemento ang karon padayon nga nag atubang og kaso, tungod sa kapakyas sa pagparehistro sa SSS segun sa gilagda sa SSS law.
Kasagaran sa mga nasakpan kaniadto, nakig areglo ra ug na solbad na ang ilang obligasyon nga napahaw-ang.
Sa mga mingsukol sa kaso, matud ni Montalbo nga ang P30 mil nga balayranan, kuwang ra kon ibayad sa abogado, unya tanan nga naelevate nga kaso, milahus ra gihapon sa pagbayad sa mga kakuwangan.
Kaniadto, sa pagkanaug sa RACE Team, daghang establisemento ang pugos nga gipangtrangkahan, apan karon, mas luag ang RACE sa kagamhanan.
Dinhi, awhag sa SSS, subay sa balaod, parehistro na ug bayari ang kontribusyon kay aron kini magamit na sa mga empleyado kon ila na nga gikinahanglan.
Ubos sa Republic Act No. 11199 o Social Security Act of 2018, ang SSS coverage pugos nga gimandu sa mga employer, employees, self-employed, ug sakop sa OFWs, mao nga gikinahanglan sila nga mohatag sa kontribusyon.
Ang SSS law nagsugo usab sa mga employers sa pagkaltas alang sa binuwan nga kontribusyon gikan sa sweldo ug pagremit niini kauban sa ilang tampo alang sa benepisyo sa empleyado ngadto sa SSS.
Kon mapakyas ang employer, mapatongan siya sa multa nga 2% matag buwan gikan sa buwan nga napalta ang bayranan. (RAHC/PIA7 Bohol)
