TAGBILARAN CITY, Bohol, August 22 (PIA) -- Dili nabkinahanglan pang magpalista ug mopila didto sa mga buhatan sa Department of Social Welfare and Development (DSWD) aron makakuha sa tabang sa kagamhanan.

Hinuon magpaabut na lang sa pahibaw sa DSWD kon asa ug kanus a mahitabo ang payout, aron wala nay kahasol sa pila.

Kini ang gipadayag sa DSWD human gikabaniog ug gihimong sumsuman sa mga tigpanaway ang bagang punsisok sa katawhan nga minghasmag sa mga buhatan sa DSWD aron maapil sa lista ug mahatagan sa hinabang.

Kahinumduman nga mingsaad ang kagamhanan nga mohatag og Educational Assistance gikan sa pundo sa Assistance to Individuals in Crisis Situations (AICS) sa DSWD.

Usa ka libo ang ihatag alang sa matag tinun an nga benepisaryo sa elementary, P2mil sa high school, P3 mil sa senior high ug P4mil alang sa naa sa kolehiyo o mikuhag vocational course.

Tulo lamang sa usa ka pamilya ang pwede makakuha sa hinabang alang sa mga biktima sa pisikal nga abuso, HIV, maoy gisaligan sa pagkaon sa banay, anak sa OFW ug PWD.

Niadtong una, gikinahanglan sa DSWD nga moaplay ug magpalista aron makaduso sa mga dokumento.

Dala niini, baga ug dasok sa katawhan ang mirumbo sa mga buhatan sa DSWD aron mahatagan sa tabang.

Karon, sa pagpakigsabut sa Department of Education, gipahibaw sa DSWD ang mga ginikanan nga dili na mopila ug magpaabut na lang sa pahibaw ug adlaw sa pagpang apudapod sa ayuda.

"Giawhag ang mga buot mangayo (sa maong ayuda) nga magpaabut sa pahibalo sa DSWD kong unsa ang mga LGUs o barangay ug asa ang lugar sa payout," pahibalo sa DSWD.

Samtang naghuwat, iandam na daan ang orihinal ug duha ka kopya sa Certificate of Enrollment ug school ID agi og pagmatuod sa pagkaenrol sa bata, dugang sa DSWD. (RAHC/PIA7 Bohol)