TAGBILARAN CITY, Bohol, August 30 (PIA) -- Adto pa lamang makuha ang bag-o nga police clearance sa hain man sa upat pa ka lungsod dinhi sa Bohol.

Human ikapatuman ang bag-ong National Police Clearance System (NPCS), sa mga munisipyo sa Jagna, Talibon, Tubigon ug Tagbilaran.

Kini pa lamang ang mga estasyonan sa kapolisan sa Bohol nga adunay kompleto nga ekipo sa pagpagawas sa opisyal nga dokumento sa pagmatuod nga ang nagkuha niini, walay sangit sa balaod.

Kini matud pa ni Police Master Sergeant Celso Orapa, kinsa kauban nila ni Police Lieutenant Augustus Cesario Sumaylo ug Police Corporal Niño Esdrelon mitungha sa sinemanang Kapihan sa PIA aron sa pagpadayag sa programa nga lakip sa gisagop sa Philippine National Police (PNP) alang sa giingong transformation niini ngadto sa usa ka world class nga pwersa.

Kahinumduman nga sukad sa mi-aging tuig, human gihimo nga pilot ang Tagbilaran City sa NCPS, niining bag-o lamang, gibuksan na usab human kabutangi sa PNP sa mga himan  amg mga estasyonan sa Jagna, Talibon ug Tubigon.

Ang NCPS, gihimong bag-o diini ang tanan nga requests alang sa pagkuha sa kamatuoran nga walay sangit sa balaod ang tawo, gibalhin na sa nasudnong buhatan sa PNP, human kini gihimong integrated na ang sistema sa records sa mga krimen.

Kaniadto, sa wala pa ang NCPS, kadtong mokuha og police clearance, moadto lamang sa ilang tagsa-tagsa ka munisipyo, didto sa buhatan sa pulis arom makakuha niining dokumento.

Ug sanglit local lamang ang clearance, dili makit-an dinhi kon ang usa  ka tawo, aduna diay record sa krimen sa ubang lugar.

Sa sama nga paagi, daku nga kahasol usab sa usa  ka tawo nga tua manarbaho sa layo nga mouli tungod lamang sa pagkuha sa dokumento. 

Dala na niini, misagot ang PNP sa digitalized nga criminal records system alang sa mas episyente nga pagmatuod sa usa  ka tawo kalabut sa pagtuman niini sa balaod.

Pinaagi sa NPCS, ang matag record sa usa  ka tawo nga isulod sa database, magkaanam kini ug update segun sa iyang mahimong salaud, nga mapasulod usab sa nasudnong crime database.

Gani, sa unang pagkuha sa police clearance, mahimo na kini nga sugdan og request sa online facility, segun pa ni Sumaylo.

Molog-in lamang sa www.pnpclerance.ph, gamit ang personal email address, ipahiluna ang petsa kanus-a kuhaon ang clearance ug  ang pagpili sa usa ka police station nga may NPCS nga nakainstalar, aron adto kuhaon ang dokumento.

Human niini, magpili sa pamaagi sa pagbayad.

Libre ang police clearance sa unang pagkuha niini alang sa unang pagtrabaho, P160 ang bayranan kon ipaagi sa bangko, kon ang mokuha senior citizen o person with disability, ug P180 kon kini adto bayran sa mga pera padala, segun pa sa kapolisan.

Dili usab iproseso ang request kon ugaling wala pa mabayari, tungod kay dili na usab modawat ang mga police stations sa itunol nga bayad, dason ni Orapa.

Kon mahuman na niini, magpaabut na sa adlaw sa pagbalik segun sa appointment.

Sa pagkuha sa dokumento, gikinahanglang ang mokuha ug tag-iya sa police clearance mismo ang mokuha kay magkinahanglan sa duha niya ka government-issued ID o PSA authenticated birth certificate.

Kuhaan usab og biometrics and magpa appointment, samtang anaa na sa estasyonan ug pwede na nga  kadugangan ang profile sa usa  ka tawo. (RAHC/PIA7 Bohol)