NAVAL, Biliran (PIA) -- Tungod sa nagkahitaas nga cases sa diarrhea sa Sitio Bliss sa Brgy. Calumpang, nanguha ug water samples ug mipahigayon ug water chlorination ang local nga pangagamhanan sa lungsod sa Naval.

Sumala pa sa Facebook post sa LGU-Naval, gipasiugdahan sa sanitary inspector sa Naval Municipal Health Office ang pagpanguha ug water samples niadtong Agosto 15 didto sa Sitio Bliss sa Brgy. Calumpang diin nasayran nga positibo sa E. Coli ang tanan upat ka water samples nga ilang nakuha sanglit mi resulta kini sa diarrhea o pagtae.

Samtang ang mga nakuhang water samples niadtong Agosto 17 sa San Roque, Brgy. Larrazabal; Brgy. Calumpang Proper; Bliss, Calumpang; Brgy. P. I. Garcia; ug Brgy. Smo. Rosario, nagnegatibo sa chlorine residual.

Aron mamahimong limpiyo ug pwedeng mainom ang tubig nga nagnegatibo sa chlorine residual, nag-disinfect ang LGU-Naval gamit ang chlorine, sumala pa sa maong FB post.

Kasumpay niini mao ang pagtalaan sa LGU-Naval sa pagpahigayon sa water chlorination sa gilaan nga mga petsa: Agosto 8 sa Brgy. Lico, Agosto 9 sa Brgy. Cabungaan; Agosto 12 sa Brgy. Lucsoon, Agosto 16 sa Brgy. P. S. Eamiguel, Agosto 17 sa Brgy. Talustusan, Agosto 23 sa Brgy. Imelda, ug Agosto 25 didto sa Brgy. Sabang.

Gibaharan usa ang mga lumulupyo sa pagpabukal sa ilang mga ilimnong tubig kung dili segurado sa kalimpiyo niini ilabi na niining panahon sa ting-uwan. (LDL/MLT/PI Biliran)