TAGBILARAN CITY, Bohol, Sept. 5 (PIA) -- Ipang-apud-apod sa Philippine Red Cross (PRC) ang cash ug hinabang alang sa kapasilungan (shelter) alang sa mga Bol-anong biktima ug apektado sa bagyo nga Odette, Septembre 6, 2022, sa alas 10:00 sa buntag didto sa Dauis Municipal Gym.

Sa taho sa PRC, mismo ang Chairman ug Chief Executive Officer sa PRC nga si Richard Dick Gordon, kauban nila ni Albetto Bocanegra ang pangulo sa delegasyon sa International Federation of the Red Cross. hepe sa deleasyon sa American Red Cross nga si  Shir Shah Ayobi ug si Gobernador Erico Aristotle Aumentado ang motambong ug mosaksi sa pagpang-apud-apod sa hinabang.

Tag P5,000 ang cash assistance nga madawat sa mga benepisaryo samtang may mga corrugated galvanized iron sheets ug mga himan sa balay, segun pa sa iniyal nga kasayuran gikan sa PRC.

Kapin kon kulang 1,210 ka banay sa Bohol gikan sa mga kalungsuran sa Pres. Carlos P. Garcia, Getafe, Danao, Trinidad, Ubay ug Talibon ang mahatagan sa shelter assistance, segun pa sa pahayag sa PRC.

Sugilon pa sa PRC ang shelter assistance may pakapin usab nga mga himan sa balay nga nagkantidad og kapin kon kulang P9,600 matag banay.   

Sa laing bahin, 358 ka mga banay gikan gihapon sa mga nahinganlang kalungsuran ang modawat sa hinabang nga cash. 

Segun pa sa PRC, mokabat sa P13 milyones ag cash nga hinabang nga ilang buhian sa Bohol, sa tag P5000 matag pamilya.

Ang paghidangat sa PRC sa Bohol Septembre 6, siyam ka buwan na human nahitabo ang usa sa labing kusog nga bagyo nga mipanit sa mga atup sa kapin sa mga 200 mil ka kabalayan sa Bohol.

Sa bagyo, kapid-an ka mga Bol-anon nga nawad-ag panimalay, may mga kinabuhi nga nakalas ug may mga kugar pa nga gipanglunopan.

Kahinumduman nga ang PRC, mihatag na usab og cash assistance sa mga Bol-anon nga apektado ug biktima sa Odette niadtong Enero niining tuig, didto sa Ubay, Talibon ug Loboc.

Hinuon, tungod kay sa adlaw mismo sa pagpang-apud-apod, dili maayo ang tempo, wala na mahidangat sa Bohol ang mga opisyales nga pangulohan unta sa Chairman nga si Gordon.

Ang pagpang-apud-apod sa hinabang nga cash ug shelter, dungan usab nga mahitabo sa silingang lalawigan sa Sugbo, didto sa may Lapulapu City Hoops Dome.

Matud sa PRC, dili gyud nila kalimtan ang mga biktima sa bagyo nga Odette ug ilang ihatag ang bisan gagmay nga hinabang, bsata makatabang sa mga Bol-anon nga makabarug og balik (rahc/PIA-7/Bohol)