CEBU CITY, Cebu, Sept. 7 (PIA) -- Aron nga makasinati ug sayun nga pamaagi sa pagbuhat sa mga transakyon ug makabaton ug mas pinalig-on nga mga serbisyo gikan sa ilang ahensya, gi awhag karon sa Pag-IBIG Fund ang ilang mga miyembro nga pahimuslan ang bag-o nilang gitanyag nga Virtual Pag-IBIG Mobile App, nga gilusad niadtong Agosto 19.
Pinaagi sa Virtual Pag-IBIG Mobile App, ang mga miyembro mamahimu nang makatan-aw ug maka monitor sa ilang Pag-IBIG savings ug annual dividends, loan balance, ug due dates gamit ang ilang mobile phone.
“With our programs nga gipang offer ngadto sa atong mga Pag-IBIG members, we hope nga ang atong mga miyembro mangita gyud og paagi nga iexplore or gamiton ang atong mga kahimanan pinaagi sa pag verify sa ilang mga accounts through the mobile app,” sigon ni Julio Carmel Alfarero Jr., ang branch head sa Pag-IBIG Cebu Colon Branch.
Sa paggamit sa Virtual Pag-IBIG Mobile App, pwede na usab masuta sa mga miyembro nga nasulod naba ang mga savings nga ilang gipang-remit ug ang mga pagbayad sa loan nga ilang gihimo pinaagi sa nagkadaiyang mga channels.
Mamahimu na usab ang virtual filing sa multipurpose loan ug ang online application sa pagkuha sa mga benefits ug claims.
Ang mobile app mahimong ma-access sa mga miyembro gamit ang ilang Virtual Pag-IBIG accounts aron masiguro ang proteksyon ug seguridad sa ilang mga datos ug personal nga mga impormasyon.
Matod usab sa ahensya nga nagpadayun karon ang ilang pananingkamot nga mabag-o ug mapalig-on pa ang virtual o internet-based verification ug mga loan availment para sa kaayohan sa ilang mga miyembro aron nga dili na sila kinahanglan moadto pa sa physical branch.
Sa pagkakaron, ang Virtual Pag-IBIG Mobile App mamahimung ma download sa Google Play ug sa dili madugay anaa na usab kini sa Apple App Store.
“With our newly launched nga mobile app, we would like to encourage katung mga Pag-IBIG members nga techy na, just search for the mobile app sa Playstore ug ma available na unya kini sa Apple app store,” pagpahinapos ni Alfarero. (RGC/PIA7 Cebu)
