TAGBILARAN CITY, Bohol, August 25 (PIA) -- Gipasupot sa Provincial Peace and Order Council (PPOC) sa Bohol ang P20 milyones nga pundo isip confidential fund alang sa pagpatunhay sa kahusay ug kalinaw sa lalawigan.

Ang confidential fund, o mas nailhan nga intelligence fund, pundo nga kakuhaan sa gobernadora, kinsa maoy tsirman sa PPOC sa pagsuporta sa pagpatuman sa mga gimbuhaton niini alang sa pagbatok sa kriminalidad, pagpatunhan sa internal security, pagpakayab sa public safety ug uban pang espesyal nga mandu sa konseho.

Kini human giaprobahan en masse sa 24 ka sakop sa konseho nga mitambong sa labing unang tigum sa konseho nga gipangunahan na ni Gobernador Erico Aristotle Aumentado.

Ang pagpasupot sa intelligence fund gisaksihan usa sa luyo-luyo nga tsirman sa PPOC nga si Bise Gobernador Dionisio Victor Balite.

Ang pagtambong ni Balite sa PPOC karon, nahimong dili kasarangan ang PPOC, kay sa katapusan nga higayon nga nagkuyog ang tsirman ug bise tsirman sa PPOC sa tigum, kini niadto pang panahon ni kanhi gobernador Erico Aumentado ug Bise Gobernador Julius Cesar Hererra.

Matud pa ni Department of Interior and Local Government Provincial Director Jerome Gonzales, subay sa lagda, nanginahanglan ang konseho og pagtugot sa tres-kwartas sa kinatibuk-ang sakop sa PPOC aron matugotan ang pagpagamit sa nahisgutang kantidad alang sa mga nag-una nga proyekto sa PPOC.

Ang pagpahat sa nahisgutang pundo, pinasubay sa Section 16 sa General Welfare Act, nga nagmandu sa mga local government units sa pagmintinar sa kahusay ug kalinaw ug pagpatunhay sa kahamugaway ug kasayon sa iyang mga mulupyo.

Ang kahusay ug kalinaw maoy sukaranan sa kaugmaran ug kalambo-an, hinungdan nga kini nahimong prayoridad sa LGUs aron pagpatigayon sa iyang mga residente nga magpuyo nga malinawon.

Sa tinuig nga budget sa Bohol, napahan na ang P20 milyones aron maoy magamit sa pagtubag sa mga nag-unang panginahanglan aron mapakayab ang kahusay ug kalinaw ug ang pagpahilayo sa publiko sa mga hulga sa kaugmaran.

Subay niini, natugotan na ang PPOC ug ang iyang mga natukod nga Special Action Committees sa pagsugod sa ilang mga katungdanan sa pagpatunhay sa kalinaw. (RAHC/PIA7 Bohol)