TAGBILARAN CITY, Bohol, August 31 (PIA) -- Padayon pa gihapon nga sirado ang link sa Department of Social Welfare and Development aron maka-apply ang mga katawhan sa Educational Assistance gikan sap undo sa kagamhanan alang sa Assistance to Individuals in Crisis Situations (AICS).

Ug tungod kay suspendido pa, kana maoy rason nga bisan pag-unsaon og click sa link nga gihatag, dili gyud molahus ang transaksyon.

Kahinumduman nga niadtong Agosto 25, sa usa ka pahibalo, gipadayag sa DSWD Region 7 nga temporary una nilang tak-opan ang online application sa Educational Assistance aron madumala sa buhatan ang pagdagsa sa mga giduso nga mga aplikasyon.

Hinuon, mipalubad pa ang rehiyonal nga buhatan nga magpaabut lang sa sunod nga anunsyo kung kanus-a mobalik og bukas ang online portal aron makasulod na usab ang aplikasyon sa mga buot modawat sa hinabang.

Gipahibaw usab sa DSWD nagdto sa mga naka-apply na pinaagi sa online ug sa personal dihang unang gibuksan ang pag-avail sa hinabang nga maghuwat sa text gikan sa DSWD aron mopadulong sa labing duol nga pay-out center, aron dili na maghuot ngadto.

Hugot nga gipasabut usab sa DSWD nga dili na sila modawat sa personal nga application diin mo-walk-in ang mismo aplikante o iyang tinugyanan, sa susama pa gihapon nga rason aron dili maghuot didto sa pay-out.

Og sa mga makadawat sa text gikan sa DSWD alang sa pay-out, seguradoha, pahinumdom sa ahensya, nga magdala sa tinuod, balido ug orihinal ug tag duh aka kopya sa ID nga dili peke, dili expired, gi-isyo sa gobernor, may pirma ug may hulagway.

Ipadala usab ang duha ka kopya sa Certificate of Enrollment o Registration, school ID sa bata, o bisan unsa nga dokumento nga gikan sa eskwelahan nga magmatuod nga na-enrol ang bata.

Kahinumduman nga nanghatag ang DSWD sa educational assistance aron may ikabayad sa mga tampohon, may ikapamalit sa mga gamit sa eskwelahan ug pangpalit og pang projects ang mga bata.

Ang hinabang gitumong nagdto sa mga estudyante nga maoy gisaligan sa panimalay, mga biktima sa pagpang-abuso, anak sa biktima sa HIV, mga anak sa OFW, PWD, mga anak sa solo parents, basta wala lay laing scholarship nga gi-enjoy.

Sa matag banay, tulo lang usab ka bata ang mahimong modawat sa hinabang.

Segun sa DSWD, sa hinabang, modawat ang anaa pa sa elementary sa P1,000; ang naa sa High School, P2,000.

P3,000 usab ang dawaton sa anaa sa Senior High School ug P4,000 ang dawaton sa mga estudyante so kelehiyo ug kadtong mingkuha sa vocational courses.

Ang sunod nga pay-out karong Sabado, September 3, sundan sa Septembre 10, 17 ug 24. (RAHC/PIA7 Bohol)