TAGBILARAN CITY, Bohol, Sept. 12 (PIA) -- Gidala sa Department of Health (DOH) ang ilang kampanya nga ‘PinasLakas’ Vaccination sa Island City Mall (ICM) sa syudad sa Tagbilaran niadtong Sabado, Setyembre 10.

Gipangunahan ang paglusad sa PinasLakas Vaccination sa Bohol ni DOH-7 Regional Director Dr. Jaime Bernadas.

Matud pa ni Bernadas nga gusto niyang ma-edukar ang katawhan sa importansya sa pagkuha sa mga bakuna og booster shots sa COVID-19.

Gidugang niini nga ang mga pagtuon nagpakita nga ang mga booster naghatag og dugay nga panalipod gikan sa mga variant sa COVID-19, ug posible usab sa mga variant nga umaabot pa.

“Ayaw nato hulata nga ang bakuna mapildi na unya sa COVID. Kinahanglan ang atong bakuna maoy makapildi sa COVID,” awhag pa ni Bernadas sa mga Bol-anon.

Ang paglusad sa PinasLakas Vaccination sa Bohol gitambongan mismo nila Bohol Gob. Erico Aristotle Aumentado, Tagbilaran City Mayor Jane Yap ug ni kanhi Tagbilaran City Mayor John Geesnell “Baba” Yap II.

Si Aumentado ug Yap nakadawat sa ilang COVID-19 booster shots atol sa maong kalihokan.

Mapasalamaton si Gob. Aumentado sa inisyatiba sa direktiba ni Presidente Ferdinand “Bongbong” Marcos Jr. nga adunay 100 porsyento nga booster rate sa tanang kwalipikadong Pilipino subay sa iyang polisiya nga wala nay lockdown aron dili makabalda sa atong dalan paingon sa pagbangon sa ekonomiya taliwala sa pandemya.

Matud pa ni Aumentado nga ang pagbakuna makatabang sa mga trabahante ug ekonomiya nga makabangon gikan sa COVID-19 pandemic.

“Arun mobalik ang atong ekonomiya, kinahanglan nga vaccinated na ang tanan aron mo-welcome sa tanang investors nga mo-invest sa atong probinsya,” matud pa ni  Aumentado.

“Para magpadayon ang atong economic recovery, karun daghang investors interesado sa Tagbilaran City and Bohol, palihog magpa-booster na gyud ta,” awhag usab ni Mayor Yap.

Si Mayor Yap niingon nga ang mga bakuna og booster ma-avail sa mga residente ug dili residente sa syudad sa Tagbilaran.

Gidugang usab niini nga iyang i-activate ang mobile vaccination aron maabot ang mga senior citizens.

Ang kampanya sa pagbakuna sa PinasLakas usa ka gipakusog nga pagbakuna og booster drive nga nagtumong sa hingpit nga pagbakuna sa 90% sa A2 o Senior Citizen nga populasyon, ingon man pagdugang sa booster dose coverage ngadto sa 50% sa kinatibuk-ang target nga populasyon sa unang 100 ka adlaw sa administrasyong Marcos.

Kini usa usab ka paagi sa gobyerno aron dali nga makuha sa publiko ang mga bakuna ug aron madugangan ang gidaghanon sa mga Pilipino nga nakadawat sa COVID-19 booster. (ECB/PIA7 Bohol)