TAGBILARAN CITY, Bohol, Sept. 12 (PIA) –- Mokabat pa sa tulo ngadto sa unom ka buwan, hangtud nga makasapal-sapal na ang tinubdan sa Bohol sa pagdugang sa kakuhaan sa isda.

Gani, ang gitagal, igo pa lamang makadugangdugang sa tinubdan sa isda, og dili pa gayud makapabarato niini.

Kini maoy banabana ni Provincial Fishery Officer Candido Samijon, Officer in Charge sa Bureau of Fisheries and Aquatic Resources (BFAR Bohol) dihang gipangutana sa kasamtangan nga sitwasyon sa pangis-daan sa Bohol.

Tulo ngadto sa unom ka buwan pa nga ma-ani ang mga bag-o nga gibuhi nga mga isda nga gikan sa mga semilya nga gipang-apod-apud sa mga tag-iyahan og fishponds o punong, pasabut ni Samijon.

Kini human gitaho sa BFAR ngadto sa kaulohan ang kapin kon kulang P300 milyones nga pundo nga kinahanglan alang sa pagpahiuli sa mismo nga mga pasilidad sa kagamhanan nga naa sa BFAR aron kapasugdan nag balik ang pag-operate human gibagyo, P15M pa lamang ang gibuhian nga pundo alang niini.

Apan bisan pa, matud ni BFAR Fishery Officer Samijon, nga ilang giseguro ang pagpahiuli sa mga production areas, bahala na kon wala pa mapaayo ang mga Administrative Offices sa pagpadagan niini, aron  makapundo na og balik sa mga semilya nga ipang-apud-apod sa mga naghupot og mga punong.

Ang industriya sa pangisdaan sa Bohol usa sa grabeng naapektohan sa bagyo nga Odette.

Matud ni Assistant Provincial Agriculturist Larry Pamugas, ang mga upland fishponds niadtong panahona, ming-apaw ug nakabuhi ang mga isda dinhi.

Sa laing bahin,  kadtong mga ponong diha duol sa dagat, giabut sa tubig ug nangabanlas.

Wala makalingkawas niini ang mga pasilidad sa kagamhanan nga gisaligan  sa Bohol sa pagpanguha og semilya sa mga isda nga buhi-on.

Saysay ni Samijon, ang hatcheries sa Sinandigan sa Ubay ug  ang duha  ka mga fish cages, nangaguba sa bagyo, samtang ang duha  ka pasilidad sa Calape, nangaguba usab ug nakabuhi ang kasaligan nga awa o bangus breeders.

Una na nga gitaho ni Assistant Provincial Agriculturist Larry Pamugas nga ang grabe nga kakuwang sa supply sa isda nakatampo og daku sa kamahal sa presyo niini.

Matud pa, sa usa  ka buwan nga kuha sa mga commercial fishers ug aquaculture, igo lamang kini sa napulo ug usa ka adlaw nga konsumo sa mga taga Bohol.

Segun  sa taho sa OPA, 451,090 ka toneladang isda sa lawod nga nakuha ug gikaon sa Bohol sa buwan sa Hulyo.

Sa laing bahin, 864,503 ka tonelada isda ang nakuha gikan sa atong kadagatan duol sa baybay.

Sa kasamtangan nga konsumo sa matag Bol-anon sa isda nga moabut sa 38.5 kilos matag tuig, mao nga kon tinambanon pagkwenta, dili ikasarang ang kuha nga isda sa Bohol.

Agi og pagsapal sa kakuwangon sa isda, gipaningkamotan sa BFAR ang pagpahiuli sa ilang mga production facilities sama sa hatcheries nga nangaguba sa bagyo.

Kini aron makabalik sila sa full-operation ug makasupply na sa semilya nga gikinahanglan aron makasulod na og isda nga buhi-on ang mga tag-iyahan og fishponds. (RAHC/PIA7 Bohol)