TAGBILARAN CITY, Bohol, Sept 12 (PIA) -- Gibuksan sa Diocese of Tagbilaran ang “Panagtagbo: 4 ka adlaw nga seminar ug pagbansay sa mga mahimong tig-abi-abi sa mga bisita sa mga simbahan ug museo sa Bohol, didto sa Elijah Spirituality Hall sa Seminaryo Mahal nga Kasingkasing ni Maria sa Taloto.
Matud pa ni Fr Milan Ted Torralba, ang bansaybansay, nahasubay sa strategic planning nga nahitabo sa diyosesis sa Tagbilaran human mahitabo ang Sinodo niadtong 1997.
Si Fr, Torralba, kinsa maoy executive secretary sa Committee on the Cultural Heritage of the Church sa Catholic Bishops Conference of the Philippines mipadayag usab sa paninguha nga makatabang ang katilingban nga Kristohanon sa inudstriya sa pamanaw (tourism) pinaagi sa pagpasiugda sa turismo nga nagasukad sa pagtuo.
Sa bansay, mahatagan usab ang mga tig-giya sa pagsuroy-kat-on sa mga simbahan sa dugang kahibaw ug kasayuran alang sa mas hugot nga pagtabang sa pagpatunhay ug pagpanalipod sa kapanulondanan (heritage).
Uban sa pag-alayon sa University of Santo Tomas Graduate school Center for Conservation if Cultural Property and Environment in the Tropics ug sa Kasing SIning, ang bansay giapilan sa mga representante sa 10 ka mga parokya sa Bohol nga nakapangandam na alang sa pagdawat sa mga turista.
Gibatbat usab ni Fr, Harold Parilla ang biblikanhon nga sukaran sa pag-abi-abi sa mga mosubay sa mga simbahan, samtang gipaambit usab ni Professor Luis Emmanuel Romanillos, kanhi pari nga Rekoleto ang hamubong saysay sa Bohol.
Si Romanillos, isip usa ka bantug nga researcher ug may daghang nasinati nga pinulongang langyaw, ug maoy naghupot sa kasaligan nga tinubdan sa natala nga kasaysayan, labi na sa Bohol sa panahon sa mga Espanyol ngadto sa 1935.
Gisaysay usab sa unang adlaw sa bansay ang unsay buhat sa usa ka tour guide.
Lakip sa mga magpaambit sa bansay mao sila Dr. Eric Zerrudo sa UST, ug Lutgardo labad alang sa mga workshop components.
Taposon ang bansay sa practicum nga adto himoon sa mga simbahan samtang may himoon usab nga pagpadala sa mga church guides ngadto na sa ilang pormal nga mga misyon. (RAHC/PIA7 Bohol)
