TAGBILARAN CITY, Bohol, Sept. 16 (PIA) -- Gipangunahan ni Department of Social Welfare and Development (DSWD) Kalihim Erwin Tulfo ang pag-turn over sa mga school building ug isolation facility ug pagpanghatag og livelihood cash assistance sa probinsiya niadtong Huwebes, Septyembre 15.

Gitugyan ni Tulfo ang 2-classroom building nga nagkantidad og P2.5 milyones alang sa Estaca Integrated High School uban ni DSWD-7 Regional Director Shalaine Marie Lucero, Bohol Gob. Erico Aristotle Aumentado, Bise Gob. Victor Balite ug Mayor Wilson Pajo ug ubang lokal nga opisyal sa lungsod sa Pilar.

Ang Catagdaan Integrated High School ug Lundag Integrated High School nakadawat usab ug mga classroom building.

Ang tulo ka 2-classroom nga mga edipisyo sa Barangay Estaca, Catagdaan ug Lundag nga nagkantidad og P7.5 milyones, produkto sa mga community volunteers sa lungsod sa Pilar, kinsa miduyog sa programa isip tubag sa panginahanglan sa edukasyon sa mga estudyante sa komunidad ug pagpatuman sa mga proyekto.

Ang mga pasilidad sa edukasyon gipundohan ubos sa Kapangyarihan sa Kaunlaran sa Barangay (KKB) sa DSWD Kapit-Bisig Laban sa Kahirapan- Comprehensive and Integrated Delivery of Social Services (KALAHI-CIDSS) program.

Kini nga mga sub-projects sa komunidad isip ilang prayoridad nga panginahanglan atol sa ilang gipahigayon nga Participatory Situational Analysis (PSA) diin gisugyot dayon nga sulbaron ang kakuwang sa mga classroom, ang gilay-on sa usa ka eskwelahan gikan sa ilang lugar, ug ang pagdaghan sa mga enrollees niining tulo ka mga eskwelahan.

Human sa pagtugyan sa mga classroom building, gipangunahan usab ni Tulfo ang pagtugyan ngadto sa munisipyo sa Pilar sa isolation facility nga adunay mga amenities, medical tools ug equipment nga nagkantidad og P19.9 milyones sa Barangay Poblacion.

Kini nga sub-project resulta sa partisipasyon sa mga miyembro sa komunidad sa Barangay Poblacion pinaagi sa pagpatuman sa naila nga panginahanglan nga motubag sa mga epekto sa pandemya sa COVID-19.

Sa wala pa mobalik sa kaulohana, personal nga gitunol ni Tulfo ang cash aid ubos sa Sustainable Livelihood Program (SLP) ngadto sa 30 ka benepisyaryo gikan sa Candijay, 80 gikan sa Carmen, ug 34 gikan sa lungsod sa Dagohoy, sa usa ka ceremonial payout.

Adunay kinatibuk-ang 144 ka benepisyaryo ang nakadawat ug P15,000 nga cash aid kada benepisyaryo, o P2,160,000.00 sa tanang recipients aron masuportahan ang panginabuhian ug mga tag-iya sa negosyo nga apektado sa COVID-19 pandemic.

Sa iyang mensahe atol sa programa, gidasig ni Tulfo ang mga benepisyaryo sa paggamit sa ilang nadawat sa hustong paagi. Matud pa niini nga ang gihatag nga hinabang gigamit alang sa pinansyal nga suporta alang sa mga pagkawala sa ekonomiya sa bag-o o nag-una nga gagmay nga mga negosyo nga naapektuhan pag-ayo sa pandemya.

"Ang Sustainable Livelihood Program, hindi ko po pera yan, hindi po rin pera ng mga opisyal natin, pero kwarta nga gikan sa buwis nga gibayad ninyo. Diha na gikan mao na ayaw na i-waldas),” matud pa ni Tulfo.

Ang mga benepisyaryo dayag nga nalipay sa pagdawat sa grant tungod kay silang tanan naglisud sa pinansyal tungod sa higpit nga pag-lockdown ug mga protocol sa COVID-19.

Si Cresencia Espinal Suarez gikan sa lungsod sa Dagohoy niingon nga nalipay siya nga nakadawat og P15,000 gikan sa DSWD alang sa Sustainable Livelihood Program. Matod ni Suarez nga iyang gamiton ang maong pinansyal nga hinabang sa pagpadagan og gamay nga sari-sari store.

Ang mga benepisyaryo una nga giila sa local government unit ug gi-endorso sa DSWD-7 alang sa name-matching base sa Listahanan database. Ang Project Development Officers ang nag-validate sa nalista nga mga benepisyaryo ug nag-assess kon sila kuwalipikado ba isip grantee alang sa Livelihood Settlement Grant. (ECB/PIA7 Bohol)