LUNGSOD QUEZON, (PIA) -- Maaari nang mag-request ang mga Public Utility Vehicle (PUV) operators ng bagong Fare Matrix/Guide kaugnay ng pagpapatupad ng Land Transportation Franchising and Regulatory Board (LTFRB) ng fare increase sa mga pampublikong sasakyan na epektibo na sa Oktubre 3, 2022.

Nauna nang inanunsyo ng LTFRB ang pagtaas ng pamasahe sa Traditional Public Utility Jeepney (TPUJ), Modern PUJ (MPUJ), Public Utility Bus (PUB), Transport Network Vehicle Service (TNVS), at Taxi noong Setyembre 16, 2022. Kasama sa kundisyon ng pagpapatupad ng taas-pasahe ang pagpaskil ng updated Fare Matrix/Guide sa loob ng mga pampublikong sasakyan.

Upang makuha ang updated Fare Matrix/Guide, kailangang isumite ng mga PUV operators ang mga sumusunod:

1.) Latest Land Transportation Office (LTO) OR/CR

2.) Franchise Verification

3.) Kopya ng Provisional Authority (para sa mga hindi pa nabibigyan ng desisyon ukol sa kanilang Certificate of Public Convenience)

4.) Official Receipt of Payment

Sundin ang mga sumusunod na proseso sa pagkuha ng updated Fare Matrix/Guide:

1.) Pumunta sa Window 13 o 14 upang ipa-assess ang babayaran para sa Fare Matrix/Guide

2.) Pumunta sa Cashier (Door B) upang bayaran ang fee para sa Fare Matrix/Guide at matanggap ang Official Receipt of Payment

3.) Pumunta sa Window 12 ipang isumite ang documentary requirements kasama ang Official Receipt of Payment

4.) Maghintay ng dalawang (2) araw bago pumunta sa Window 11 upang makuha ang updated Fare Matrix/Guide.

Bukas ang tanggapan ng LTFRB upang tumanggap ng mga request ng Fare Matrix/Guide mula Lunes hanggang Sabado.

Paalala ng LTFRB na bagamat makapag-iissue na ang ahensya ng updated Fare Matrix/Guide, sa Oktubre 3, 2022 pa magiging epektibo ang fare increase sa mga pampublikong sasakyan.

Mariing sinabi ng LTFRB na hindi pa pinahihintulutan na magtaas ng pasahe ang mga PUV drivers habang hindi pa ito epektibo.

Bukod dito, kailangan pa ring sumunod sa mga alituntunin at polisiya ng ahensya ang mga PUV driver at operator, alinsunod sa mga kundisyon at probisyon ng kanilang Certificate of Public Convenience (CPC) at Joint Administrative Order 2014-01.

Paalala pa ng ahensiya na kung may reklamo kaugnay pagpapatupad ng fare increase sa mga pampublikong sasakyan, maaaring ipaabot ito sa LTFRB 24/7 Hotline: 1342 o mag-send lang ng mensahe sa LTFRB Official Facebook page o magtungo sa official website ng LTFRB. (LTFRB/PIA-NCR)