SIQUIJOR, Siquijor, Sept. 28 (PIA) -- Saksi ang daw nagkalayo nga adlaw sa engrande'ng selebrasyon nga gipahimutang sa kagamhanan sa Siquijor alang sa pagsaulog sa ika 51 nga Adlaw sa Probinsya sa Isla.
Ang Adlaw sa Siquijor mismo gisugdan pinaagi sa grandyosong parada nga gipangulohan ni Gobernador Jake Vincent Villa uban sa mga lokal nga opisyal, mga nagkadaiyang ahensya, publiko ug pribadong buhatan ug tunghaan, organisasyon ug uban pang mga sektor sa katilingban.
Aktibong nakigduyog ang mga Siquijodnon sa gipahigayong festival float parade contest ug street dancing sa matag munisipalidad diin nagpasigarbo sila sa ilang mabolokon ug maanindot nga mga dekorasyon ug sayaw nga makaingganyo gayud sud-ongon.
Pipila sa mga mananayaw sa 'Street Parade' niadtong Adlaw sa Provinsiya sa Siquijor. (RAC/PIA7-Siquijor)
Lakip na sa kasaulogan ang State of the Province Address (SOPA) ni Villa diin gipadayag niya ang iyang mga programa, proyekto ug pagpaningkamot alang sa kauswagan sa isla.
Nagpa-ambit usab si Bise-gobernadora Mei Ling Quezon-Brown sa iyang pagpasalamat alang sa pakigduyog sa mga Siquijodnon sa maong pista.
Ingon man, daghan pang mga pasundayag kon 'showcase of talents and Siquijor's bests' ang gipahigayon atol sa pagsaulog sama sa mga sayaw sa Handulantaw, kanta sa PaSinggarbo, 'art and photo contests, AgriTourism Trade Fair, sports,' Halad Siquijodnon, ug uban pa.
Tunhay gayud ang kalipay sa mga Siquijodnon nga sa hinay-hinay nakalingkawas na sa bendahe sa pandemya samtang kini niningkamot sa padayong pag-uswag Siquijor. (RAC/PIA7 Siquijor)
Miduyog usab ang Philippine Information Agency ug uban pang mga ahensiya sa parada ug sa daghan pang mga aktibidades sa pagsaulog sa 51st Adlaw sa Probinisya sa Siquijor. (RAC/PIA7-Siuqijor)
