TAGBILARAN CITY, Bohol, Sept. 21 (PIA) -- Mahimo man nga epektibo sugod Oktubre 4 ang usbaw sa pletehan nga gitugotan sa Land Transportation Franchising and Regulatory Board (LTFRB) alang karong panahon sa kalisud, dili pa makapaningil sa usbaw nga pletehan ang mga drivers hangtud makabayad sila ug makakuha sa certified nga bag-o nga Fare Matrix.

Ug kon may mokubra man og labaw sa gitugot kanila nga wala pa nakapahimutang sa ilang bag-o nga fare matrix sa lugar sa ilang mga units nga maklaron sa mga sumasakay, may P5,000 nga multa sa unang pagkasakop ang giandam sa LTFRB.

Mokabat usab sa P10 mil ang multa kon masakpan nga nag-overcharge sa ikaduhang higayon apil na ang pag-impound sa unit sulod sa 30 ka adlaw, ug P15 mil lakip na ang pagkanselar sa Certificate of Public Convenience nga gihatag sa unit alang sa iyang ruta kon masakpan sa ika tulong higayon.

Matud usab sa LTFRB, P510 ang bayranan sa pagsaka sa pletehan sa usa  ka operator ngadto sa LTFRB, samtang P50 usab ang ibayad alang sa sertipikasyon ug bayad sa fare matrix, subay san tice nga gipagawas ni Regional Director Engr. Eduardo Montealto Jr., sa LTFRB.

Ug bisan sa pag-usbaw, padayon pa gihapon nga gimandu sa LTFRB ngadto sa mga drivers ug operators sa sakpanang pampasahero sa pagtuman sa 20% nga diskwento alang sa mga senior citizens, estudyante ug mga may kabilinggan nga makapakita sa ilang kamatuoran sama sa ID.

Gawas niining mga nahisgutan nga balayranan, kinahanglan ang operator nga magpakita sa iyang prangkisa, Official Receipt ug Certificate of Registration aron makakuha sa Fare Matrix.

Sa labing bag-o nga katikaran, human dungga sa LTFRB ang hangyo sa mga operators sa pangpubliko nga sakyanan, motugot na ang kagamhanan sa labing manos P2 nga usbaw sa base fare.

Tungod niini, sugod sa Oktubre 4, ang tanan nga tradisyonal nga Public Utility Jeepney makakubra na og tag P12 ang unang 4 ka kilometro ug P1.80 sa matag sunod nga kilometro.

Ang mga jeepney nga aircon o modernong jeepney gitugotan usab sa pagpaningil sa P14 sa unang 4 ka kilometro ug laing P2.20 sa matag kilometro nga nagsunod.

Ang mga ordinary nga bus, makapaningil na og P11 matag unang 4 ka kilometro ug P1.90 sa matag kilometro nga nagsunod.

Sa mga aircon bus, P11 ang singil sa unang 4 ka kilometro samtang P2.10 usab ang nagsunod nga mga kilometro. 

Sa deluxe buses, P11 pa gihapon ang iyang  base fare ug P2.25 ang matag sunod nga kilometro.   

Sa mga taxi ug kadtong gitawag nga Transport Network Vehicles Services (TNVS), P35 ang flagdown rate kon kini nga sakyanan hatchback ug compact cars sama sa Wigo, Eon, Alto, Picanto samtang P40  usab ang flagdown rate sa mga awto nga sedan.

Sa mga SUV ug vans ng gigamit alang niini, P45 ang flagdown rate samtang wala itugot sa LTFRB nga magdugang sa ilang matag kilometro nga abton, kon dili sagopon pa gihapon ang kinaraan nga rate. (RAHC/PIA7 Bohol)