TAGBILARAN CITY, Bohol, Oct. 7 (PIA) -- Haum sa pangandoy ni Gob. Erico Aristotle Aumentado nga ikapakita ang bag-ong dagway sa turismo sa Bohol nga sahi sa mga makita niadtong 10 ngadto sa 20 ka tuig na ang hinglabay, buksan sa Bohol, sa pag-abag sa Department of Tourism (DOT) ang usa ka kalihukan nonot niini.
Matud pa sa DOT, “atong gikalipay pagpahibaw kaninyo nga ani ana kita sa sunod nga yugto sa pag-ugmad sa banner programs sa ahensya nga FARMS7 ug OUTDOORS7.”
Kahinumduman nga nahuman na ang DOT kaabag sa provincial local government unit (LGU) ug mga municipal LGUs sa hiniusang -product audits sa mga bag-o nga mga nasubay na ug nakapasar nga suroyanan sa Farm-Fork-Fitness (FFF) ug Outdoor Adventure Trails sa Bohol.
Karon, matud sa DOT, ila na nga ipadayon ang pagpataas sa bili sa mga gitanyag nga mga produkto ug destinasyon pinaagi sa pagsumpay niini sa mga gipili nga mga sumbanan sa mga turista sa bag-ong normal, matud pa ni DOT Regional Director Shalimar Hofer Tamano.
Lakip sa mga sumbanan nga gipaneguro sa mga turista nga ilang makita sa ilang sunod nga mga suroyanan kinahanglang naglakip sa luwas nga pagpuyo ug pagsuroy sa mga suroyanan nga bukas o open air, mga suroyanan ug mga kalihukan nga dyutay ra ang tawo, ug ang maayong pagdumala sa mga kasinati-an sa wellness.
Subay niini, matud ni Tamano nga maghimo na usab ang ahensya og mga kalihukan nga maghatag og dugang kapasidad sa mga lumilihok sa turismo lakip na ang Tourism Product Development Workshop sa Octobre 18, 2022, ug usa ka Validation Workshop sa mga bag-ong nahan-ay nga Tourism Circuits sa Octobre 19, 2022.
Kahinumduman nga ang DOT7 nagpabukas sa Farm, Fork, Fitness tourism sa FARMS7 ug ang Outdoors7 nga nagalangkub sa mga kalihukan nga may kalambigitan sa pisikal nga pagsinati sa outdoors sa Bohol.
Sa iyang unang 100 ka adlaw sa Kapitolyo, si Aumentado mipadayag nga sa paglugak sa mga health restrictions ug sa di na kapugngan nga kaikag sa mga turistang langyaw ug domestic tourists nga mogawas ug mosuroy, gikinahanglang nato nga moabante sa dugang kusog ug itulak ang industriya sa turismo.
Nakahimo na kita og mga bag-o ug inutok nga plano sa paghandus sa nasugdan nga nga nagsulbong nga turismo sa Bohol sa wala pa ang pandemya.
“Kinahanglan nato nga magbukas og daghang mga bag-ong lingaw suroyanan, kinahanglang natong mag-innovate, kay nasayud kita nga aduna kitay daghang talagsaon nga mga sangkap ug ikadalit nga mas makahaylo og dugang mga turista,” saysay sa gobernador. (RAHC/PIA7 Bohol)
