TAGBILARAN CITY, Bohol, Oct. 19 (PIA) -- Nagpahinumdom ang Department of Labor and Employment (DOLE) sa mga employers kalabot sa husto nga mga lagda sa pagbayad sa Oktubre 31.

Kini human gideklara ni Pangulong Ferdinand “Bongbong” R. Marcos Jr., nga special non-working holiday ang Oktubre 31 pinaagi sa Proclamation No. 79 aron mahatagan og taas nga panahon ang mga empleyado nga makauban ang ilang mga pamilya.

Tungod niini, mipagawas og pahayag ang DOLE nga ang mga empleyado nga mosulod sa trabaho sa October 31 nga gideklara isip special non-working holiday angay adunay dugang nga 30 porsyento sa ilang daily rate alang sa unang walo  ka oras sa pagtrabaho.

Samtang dugang usab nga 30 porsyento ang ihatag sa hourly rate sa empleyado alang sa overtime sa maong adlaw base sa lagda sa DOLE.

Sa maong polisiya, sakop sa “no work, no pay” policy ang Oktubre 31 gawas na lamang kun adunay company policy o collective bargaining agreement.

Una niini, gi-anunsyo sa Palasyo nga gideklarar ni Presidente Marcos ang Oktubre 31 nga gitawag usab og All Saints’ Eve isip special non-working holiday. (ECB/PIA7 Bohol)