SIQUIJOR, Siquijor, Oct. 24 (PIA) -- Panghingusgan sa Departamento sa Agrikultura (DA) ang pagpauswag sa abot sa humay sa lalawigan sa Siquijor pinaagi sa Programang Masagana 150 ug 200.

Sumala pa, ang maanindot nga isla sa Siquijor, aduna lamang suma total 500 ka ektarya nga humaynan ug duol 110, 000 ka mga lumulopyo dugangan pa sa mga turista.

Tungod niini, nakita sa buhatan sa agrikultura  ang dakong ang panginahanglan sa isla sa suplay sa bugas.

Si Rodolfo S. Anulacion, Senior Science Research Specialist sa DA Siquijor, sa iyang pakighinabi sa Philippine Information Agency-(PIA) - Siquijor , miangkon nga sa pagkakaron, ang Isla sa Siquijor anaa lamang sa upat ngadto sa lima ka tonelada kada hektarya  nga abot sa humay hinungdan nga angay gud panghingusgan ang pagpauswag sa abot.

“Maglisod  gyud nag pakaon sa almost 110,000 nga population nga taga Siquijor, unya dungagan pa na siya sa mga turista.  Panghingusgan gyud nato nga mapakaon ni sila - ang atong mga  Siquijodnon nga mga katawhan, lakip na ang mga dumduong  sa isla,” dugang pa ni Anulacion.

Apan sanglit kay sa kanunay anaa may pamaagi ang tanan, ug kini mao ang pagpalambo sa produksyon sa humay, ang mga Siquijodnong mag-uuma, maka-angkon sa dekalidad nga binhi sa humay subay sa Masagana 150 ug 200 Program ni Presidente Ferdinand R. Marcos, Jr. nga mao usab ang Secretary sa Department of Agriculture.

Ang maong programa, sumala pa,  ilusad sa Siquijor karong umalabot Nobyembre 2022.

Ang masagana 150 mao ang produksyon sa inbred rice diin ang target nga ani niini mga 150 ka kaban kada ektarya samtang ang masagana 200 mao ang produksyon sa hybrid rice diin ang target nga ani niini kada ektarya, 200 ka kaban.  (RAC/PIA7 Siquijor)