TAGBILARAN CITY, Bohol, Oct. 21 (PIA) -- Upat ka mga lungsod sa Probinsya sa Bohol ang nakasulod karong tuiga ug nakadawat og 8 ka mga awards sa lain-laing mga kategoriya sa gipahigayong 10th Cities and Municipalities Competitiveness Index (CMCI) Summit sa Philippine International Convention Center (PICC) sa kaulohan niadtong Oktubre 20, 2022.

Ang Bohol nakasulod sa top awards human ang Munisipyo sa Corella nahimutang sa Top 3 sa 5th to 6th Class municipalities ug ang lungsod sa Panglao nahimutang sa Top 4 sa 3rd to 4th Class municipalities isip Overall Most Competitive Municipalities.

Sa Economic Dynamism Pillar, ang Munisipyo sa Panglao nakadawat sa pasidungog isip Top 1 ubos sa 3rd to 4th Class Municipalities Category samtang ang Munisipyo sa Jagna maoy nakakuha sa Top 6 nga lugar.

Sa Infrastructure Pillar, ang Munisipyo sa Panglao nahimutang sa Top 2 ubos sa 3rd to 4th Class Municipalities Category samtang ang Munisipyo sa Corella nahimutang sa Top 7 nga dapit ubos sa 5th to 6th Class Municipalities Category.

Samtang ang Munisipyo sa Corella nakadawat og laing pasidungog isip Top 6 sa Innovation Pillar ubos sa 5th to 6th Class Municipalities Category ug ang Munisipyo sa Inabanga maoy Top 7 sa Resiliency Pillar ubos sa 3rd to 4th Class Municipalities Category.

Si Panglao Mayor Edgardo Arcay personal nga nidawat sa mga pasidungog samtang si DTI-Bohol Provincial Director Maria Soledad Balistoy kinsa diha usab atol sa summit ang nidawat sa mga pasidungog sa ngalan sa Munisipyo sa Corella.

Kaniadtong 2021, ang lungsod sa Panglao usab ang Top 1 sa Economic Dynamism Pillar ug Top 2 sa Infrastructure Pillar ubos sa 3rd to 4th Class Municipalities Category, parehas nga ranggo nga napadayon sa munisipyo karong tuiga.

Ang ubang awardees sa miaging tuig mao ang lungsod sa Jagna, Carmen, ug Anda.

Gipasiugdahan sa Department of Trade and Industry (DTI) pinaagi sa ilang Competitiveness Bureau, ang CMCI usa ka programa nga nagtumong sa pagsukod sa performance sa mga syudad ug lungsod sa nasud base sa upat (4) ka haligi: Economic Dynamism, Government Efficiency, Infrastructure, ug Resiliency.

Kining programa usab nagtumong sa pagpaambit sa labing maayo nga mga gawi sa lain-laing mga rehiyon nga nagtugot sa mga syudad ug munisipyo sa pag-benchmark sa ilang nahimo batok sa lokal ug global nga mga sumbanan. (ECB/PIA7 Bohol)