TAGBILARAN CITY, Bohol, Nov. 3 (PIA) -- Human gilampurnas sa bagyong Odette ang mga pasilidad sa Bureau of Fisheries and Aquatic Resources (BFAR) ilabi na ang mga papu-anan sa itlog sa awa, tuyo nga hatagan og temporaryong solbad ang kakuwang sa semilya sa bangus dinhi.
Matud pa ni Acting Provincial Agriculturist Larry Pamugas, ang pagpanghatag og balik sa sudsod nga maoy gigamit kaniadto sa mga mananagat nga manarap sa semilya sa bangus, diha sa mga kabaybayonan sa Bohol, dili na unta praktikal kon wala pa mangadaut ang mga pasilidad sa paitlogan sa kagamhanan.
Subay sa taho sa OPA, sa 15 mil ka breeders ug 1,500 ka awa, 15 na lamang ka awa ang gibilin human nakabuhi kin isa bagyo.
Dinhi sa Bohol, diin ang Kapitolyo may mga pasilidad sa paitlogan sa Talibon, Clarin ug Calape, nagka krisis na sa supply sa semilya sa bangus, mao nga gibalik ang pagpanudsod.
Apan sa dinaliang panginahanglan nga makaabag sa supply sa semilya sa bangus ilabi na karong tingnihit sa isda, napugos sila paghatag niining sudsod isip temporaryong solusyon.
Ang pagpanarap kasagaran magsugod sa pagsugod sa Marso hangtud sa Hunyo, kanus-a tingpangitlog sa awa.
Hinuon, tungod kay kining masarap nga semilya gikan sa mga bangus sa lawod, magdepende kanunay sa swerte ang kadaghanon sa makuha sa pila ka oras nga pag-ubog sa tubig.
Mokabat sa 130 ka units alang sa supplies sa mga gamit sa paghimo sa sudsod para panarap sa semilya sa bangus ang gisugyot nga itugyan ngadto sa mga tigpanarap sa bangus sa pito ka mga kalungsuran sa Bohol, subay sa giduso nga laraw sa OPA ug gisuprtahan usab ni Gobernador Erico Aristotle Aumentado aron lihokon sa Sangguniang Panlalawigan.
Subay sa bili sa matag unit nga gipakita sa OPA, mokabat sa P4,100.00 ang matag sudsod nga gastohan sa kagamhanan aron ikatugyan sa labing dali nga panahon.
Segun pa ni Bise Gobernador Victor Dionisio Balite, ang gisugyot nga transfer without cost nga gastohan sa Capital Outlay sa Kapitolyo, kini magkinahanglan nga ubanan sa Letter of Intent nga magagikan sa kahugpungan nga mangayo niini, ang kompleto nga listahan sa ilang mga opisyales ug ang resolusyon sa SP nga magtugot niining pagtugyan.
Sa gilaraw, mohatag og 10 ka units sa sudsod sa Loay, 10 ka units sa Valencia, 30 ka units sa Garcia Hernandez, 10 ka units sa Jagna, 30 ka units sa Guindulman, 30 ka units sa Anda ug 10 usab ka units sa Mabini.
Kinatibuk-an nga P544,300 mil ang puhunan sa Kapitolyo alang niini, apan dili usab makwenta ang tabang nga ikahatag unya sa mga manarapay sa semilya ngadto sa pagseguro sa isda nga makaon sa mga Bol-anon. (RAHC/PIA7 Bohol)
