LUNGSOD CALOOCAN, (PIA) --Magkasamang ibibana nina Mayor Maria Sheilah "Honey" Lacuna-Pangan at Bise Alkalde John Marvin "Yul Servo" Nieto ang Pamahalaang Lungsod ng Maynila sa mga residente ng unang distrito kahapon, Nobyembre 9 na isinagawa sa Morsacc Basketball Court sa Tondo.

Kasama nila ang mga pinuno ng iba't ibang departamento sa pagtugon sa mga suliranin at katanungan ng mga residente sa Zone 6 at Zone 7.

Naroroon rin ang kinatawan ng District 1 Congressman Ernesto "Ernix" Dionisio, Jr. maging ang lima sa anim na konsehal ng nasabing distrito.

Ang pagpupulong ay dinaluhan ng mga Punong Barangay, mga Pinuno ng Sangguniang Kabataan, mga Lider ng TODA, mga Presidente ng Senior Citizen, at mga kinatawan ng mga non-government organizations ng Zone 6 at Zone 7.

Karamihan sa mga katanungan at mga suliraning ibinahagi ng mga dumalo ay ukol sa kalusugan, kaligtasan, at kaalwanan ng kalagayan ng mga residente.

Ipinaliwanag ni Mayor Lacuna-Pangan ang kasalukuyang ipinatutupad na "referral system" ay upang maiwasan ang pagpapabalik-balik ng mga pasyente bago matugunan ang kanilang pangangailangang medikal.

Dagdag niya, mayroon ng mga laboratoryo sa mga health center na makatutulong na matugunan ang pangunahing pangangailangan ng mga non-emergency patients.

Sa pamamagitan nito, ayon sa Punong Lungsod, ang mga pangunahing lunas at serbisyong medikal na hindi nangangailangan ng pagpapa-ospital ay matutugunan sa health center pa lamang.

Ang mga pasyente namang nangangailangan ng pagpapaospital ay maaasistehan sa pamamagitan ng referral upang sila ay maiskedyul at agarang maasikaso sa ospital.

Bilang isang doktora, muling nagpaalala ang Punong Lungsod na bagaman boluntaryo na lamang ang pagsusot ng face mask alinsunod sa inilabas na executive order ng Pangulo ay hinihikayat pa rin niya ang pagsusuot ng face mask lalo sa mga high risk tulad ng senior citizens.

Ukol naman sa kaligtasan, ibinahagi ng ilang residente ang kanilang pagkabahala sa mga aksidente dulot ng kakulangan sa ilaw at sa mga open na manhole.

Ayon naman kay City Engineer Armando Andres, agad niya itong patitignan at tutugunan.

Maliban dito, ibinahagi rin ng isang residente ang kanyang suliranin dulot ng mga nagkalat na aso na maaaring makapangagat o makadagdag sa pagkalat ng dumi.

Ani ng Punong Lungsod na sa susunod na taon ay may nakalaang pondo para sa karagdagang city pound na mag-iikot sa lungsod.

Karamihan naman sa mga katanungan ukol sa kaalwanan ng kalagayan ng mga residente ay ang senior citizen monthly allowance.

Ayon kay Elinor Jacinto ng Office of Senior Citizen Affairs (OSCA), inaasahan na mas malinis ang listahan ng senior citizen para sa allowance simula Setyembre hanggang Disyembre.

Ito ay dahil sa consultative meeting ng OSCA at mga punong baranggay.

Maliban dito, ang mga pamilya naman ng mga yumaong senior citizen na hindi na nakaabot sa payout, ay may aasahang burial assistance.

Itong hakbanging ito ay kasalukuyang nasa ikatlong pagbasa na.

Ukol naman sa mga allowance noong 2020 na hindi nai-claim, ibinahagi ng Punong Lungsod na patuloy na nakikipag-ugnayan ang Pamahalaang Lungsod sa PayMaya.

Ito ay upang maibalik ang allowance na kasalukuyang nasa PayMaya card ng mga senior citizen sa Pamahalaang Lungsod na siya ring ipamamahagi sa mga senior citizen na hindi nakapagclaim.

Karaniwang mga rason kung bakit hindi nila nakuha ang kanilang allowance ay hindi matandaan ang PIN o kaya naman ay nagpalit ng cellphone number na nagsilbing account nila sa PayMaya. (pio manila/pia-ncr)