CORTES, Bohol, Nov. 10 (PIA) -- Nasakmit sa Bien Unido, kauban sa Alburquerque, Antequera, Corella, Getafe ug Tubigon ang nasudnong pasidungog ug Selyo sa Child-Friendly Governance alang sa 2021.

“Ang pasidungog sa Bien Unido nagpakita na sa bunga sa mga kahago ug paningkamot nga himoon ang lungsod nga paraiso sa mga kabataan ug mas sayon alang kanila nga magdaku sa maayong kalikopan,”  butyag ni Mayor Rene Borenaga, sa iyang pagkasayud sa pasidungog.

Si Borenaga ug Bise Mayor Renato Gonzales Hoylar, parehas nga nagpadagan sa tagsatagsa ka mga buhatan sa ehekutibo ug lehislatibo aron tutokan ug hiusahan ang mga plano, projekto ug kalihukan nga magpa-asdang sa kaayohan sa mga kabataan.

Ang pasidungog, un ana nga gihulma sa nasudnong konseho alang sa Council for the Welfare of Children (CWC) niadto pang 2014, dungan sa paglusad sa “Child-Friendly Philippines: A Caring and Protective Society for, by, and with the Children.”

Usa ka adbokasya ug haligi sa programa nga gisagop sa CWC agi og pagtubag sa nasudnon ug international nga mga pana-ad sama sa Child 21 ug sa ikaduhang 2nd National Plan of Action for Children, ang pagtanyag sa selyo sa Child-Friendly Governance nahasubay usab sa United Nations Convention on the Rights of the Child (UN CRC).

Sa kaso sa Bien Unido ug sa mga kalungsuran sa Bohol nga nakakuha sa pasidungog, nakit-an nga sila nagduso sa child-friendly local governance sa ilang mga natungdan nga local government units (LGUs) pinaagi sa paghatag og prayoridad sa kabataan sa ilang mga plano, budget, balaod ug pagpadagayday sa serbisyo dungan sa pagseguro nga ang mga kabataan makakuha sa ilang mga nag-una nga katungod sama sa pagpakabuhi, pag-ugmad, panalipod ug pagpanginlabut sa mga kalihukan sa lungsod.

Ang epekto niini, mao ang pagpili sa mga kalungsuran nga nagasubay sa lagda aron matanyagan sa Seal of Child Friendly Local Governance (SCFLG) agi  og pag-ila sa mga LGUs nga naghatag og positibong resulta sa kaayohan alang sa kabataan.

Ang SCFLG gisuprtahan usab sa Department of the Interior and Local Government pinaagi sa Memorandum Circular (DILG MC) 2014-80 niadtong Julyo 7, 2014 nga nagaendorso sa Child Friendly Local Governance Audit (CFLGA) ngadto sa mga Gobernador, mayor ug mga tinugyanan sa kagamhanan nga may kalambigitan niini.

Adunay 12 ka mga criteria usab nga subayon aron gradohan ang mga LGUs sa dili pa hatagan sa SCFLG: pagkunhod sa mga mamatay sa kabataan nga 5 anyos paubos, pagkunhod sa kabataan nga ubos og timbang, pagdaghan sa kabataan nga mitambong sa daycare, kadaghanon sa kabataan nga mingtapos sa elementarya, kawalay kaso sa kabataan nga gipatrabaho, mga biktima sa abuso, pagpanagmal, pagpahimutang sa luwas nga komunidad ug tunghaan, pagpa-apil sa kabataan sa mga kalihukan sa LGU, pagpahimutang sa VAWC desks, pagpasulod sa Philhealth sa mga pasilidad nga magamit sa kabataan, ug pagpahigayun og Local School Board (LSB) plan nga nakasubay sa School Improvement Plan (SIP) ug ang pagtuman sa LSB Plan. (RAHC/PIA7 Bohol with reports form MPIO Manielito Item)