TAGBILARAN CITY, Bohol, Nov. 7 (PIA) -- Mikabat na sa P131 ang pagsaka sa presyo sa lechonon nga baboy gikan sa Enero niadtong miagi nga tuig hangtud sa presyo sa Octubre.

Segun sa taho ni Provincial Veterinarian Dr. Stella Marie Lapiz, gikan sa P119 ang taga kilo sa buhi nga lechonon, anaa na kini karon sa P250 ang kilo, butang nga makahatag og hamugaway nga ginansya sa mga tig-alima og baboy para lechonon.

Apan, kon daku man galing og ginansyahon kay karon nga mingmahal na ang kilo sa baboy, tabla ra kini og wala kon makasulod nganhi ang gikahadlokan nga African Swine Fever (ASF).

Ang ASF labing ulahi nga gikataho nga nakasulod na sa Region VI ug sa Region VIII, samtang nataho na usab nga naka-igo na sa mga baboyan sa isla sa Camiguin.

Tungod niini, bugtong ang Region VII o Central Visayas na lang ang nagpabiling luwas pa sa sakit.

Hinuon, dason ni Dr Lapiz, sa ka duol sa Bohol sa mga lugar nga apektado na, kon dili makamao mo-amping ang matag usa, hayan maangin pa niini ang binilyon nga negosyo sa  industriya sa baboyan sa Bohol.

Ang Bohol, matud pa sa Office of the Provincial Veterinarian, nakasinati gani og maayong presyo sa pagpamaligya og inihaw nga karne sa baboy, bisan pa kon gisamok sa hulga sa ASF.

Niadtong Enero sa 2021, mapalit ang karne sa baboy sa tag P195 ang matag kilo.

Sa pagtungtong sa Oktubre niining tuiga, mitikang na ang presyo sa karne ngadto sa P320.

Kinatibuk-ang P125 na ang saka sa presyo sa karne, butang nga angay gihapon ika-aghat sa mga Bol-anon nga  magpadayon sa pagpamuhi og ihawon.

Sa laing bahin, sa presyo sa buhi nga baboy, gikan sa P133 ang kilo sa buhi nga baboy, pag-abut sa Oktubre, mipatong na sa P180 ang komprada sa matag kilo sa buhi nga baboy.

Sa nagkanindot nga presyo sa pagbaboyan, pahinumdom sa beterinaryo: pugngan gyud ang pagbitbit og karne, o niluto ug giproseso nga karne gikan sa gawas sa Bohol, kay mahimo nga panaagi niini, makasulod na hinuon ang kagaw nga maoy kina-ingnan sa pagkamatay hangtud sa pagkapuo sa mga baboy sa ubang bahin sa nasud.

Ang ASF, dili man hinuon makadaot sa tawo, apan kon sa iyang paglakawlakaw, makadala kini og kagaw nga makasakay usab sa iyang pagpauli sa Bohol, mahimong kini ang sinugdanan sa  pag-atake sa sakit dinhi. (RAHC/PIA7 Bohol)