TAGBILARAN CITY, Bohol, Nov 3 (PIA) -- Ayaw tipigi ang tuskig nga kwarta, hinuon, kini maoy una’ng gamita aron ang mga dunot, ikadepositio nga ug makaabut sa mga bangko aron mawala na sa sirkulasyon.

Kini maoy tambag sa Bangko Sentral ng Pilipinas (BSP) pinaagi ni Bank Officer V Greg Baccay, taliwala sa pagpaningkamot sa kagamhanan nga himoong mas limpyo na ang mga kwarta nga naglibot ug mawala na ang mga kwartang dunot.

“Niay ato’ng kina-iya nga  sa matag ukab sa pitaka, ang kadtong nindot  maoy atong ipabilin, unahon og pagawas ang dunot, kon ingon niini, magkasamot og kadunot ang kwarta nga maglibot-libot, samtang ang mga kwartang nindot, mahibilin nga natipigan,” sugod ni Baccay.

Hinuon, niining panahon sa padayon nga hulga sa gikahadlokan nga sakit, aghat sa BSP nga mogamit na sa digital nga payment system.

“Ang pandemya nagapa-usab sa daghanang aspeto sa atong kinabuhi, sa atong katilingban, usa na niini ang pagsulod sa digital payments nga paspas nga nagpuli sa mga pamaagi sa atong kinabuhi,” dugang sa opisyal sa bangko.

Ang digital payment usa ka panaagi sa pagbayad sa kwarta tali sa duha ka entity pinaagi sa digital nga himan sama sa ATM cards, credit cards, prepaid cards nga adunay cash nga katumbas, bank transfers nga pinaagi sa electronic fund transfer ug mobile wallets diin ang pagbinayranay, gipaagi sa electronic medium o e-money.

Ang digital payments system, bahin sa programa sa BSP agi og pagdalit sa usa  ka Pilipinas nga napanalipdan ug ekonomiya nga napalig-on human sa pandemya.

Gilusad sa BSP ang Digital Payments Transformation Roadmap niadtong miaging tuig , aron palig-onon ang pagpili na unya sa mga konsumidor sa bag-ong pamaagi sa pagbayad, palapdon pa ang mga Pinoy nga magbuhat og ilang transaction accounts ug ganoyon ang nasud ngadto na sa usa  ka katilingban nga dili na magpermi og bitbit og dagkong bili sa kwarta o cash-lite.

Sa sistema sa digital payments, mahimo niining paubsan pa ang bili sa mga transaksyon kay wala na may kinahanglang daghang mga tawo ug tellers, ug pawagtangon na niini ang daghang panginahanglan aronmakakuha og transaction accounts kay mahimo na kini pinaagi sa Paymaya, GCash ug uban pang digital payments systems.

Pananglitan, matud sa BSP, sa paggamit sa PESONet o InstaPay, makadaginot ang Pilipinas of 25%-56% sa pagpadagan sa mga papeles nga natangag sa tseke, kon ang kinaraang pamaagi mapulihan sa digital payments system, matud ni Baccay.

Ug tungod kay mas paspas agg pagpabalhin sa kwarta, mas dali ug mas magamit kini dayun sa nanginahanglan, kon itandi sa uban nga manginahanglan pa og check clearing.

Inay mogamit sa tseke, sa PesoNet, mahimo na ang electronic fund transfer, sa daku nga bili sa transaction, alang sa mga planado ug dili dinaliang transaksyon.

O mahimo usab ang InstaPay alang sa ginagmay nga balayranan, madawat dayon bisan unsang orasa og kaya taman P50 mil, nga dili ka na magkinahanglang magdala og cash.

Ug alang sa mga electronic wallet, tulo na   ka service providers  ang ania: GCash, Maya ug coins.ph alang sa mga online payments, matud ni Baccay.  (RAHC/PIA7 Bohol)