TAGBILARAN CITY, Bohol, Nov. 4 (PIA) -- Dul-an na sa P22 milyones ang nahipos sa mga tinugyanan sa kagamhanan nga bili sa illegal nga drogas gikan pagtikang sa bag-ong tuig taman Oktubre 25.

Kini maoy gipaambit ni Bohol Provincial Police Office Chief of Operations Police Lieutenant Colonel Norman Nuez, didto sa ika duhang Provincial Peace and order Council (PPOC) Meeting ubos ni Chairman Gob. Erico Aristotle Aumentado, Oktubre 27, didto sa Ceremonial Hall sa Kapitolyo.

Kini nag representar sa 3,231.88 ka gramo nga illegal nga substance nga shabu sulod sa unang 298 ka adlaw sa tuig.

Kin usab nagpasabut nga sa inadlaw nga kwenta, gikan sa Enero, may P73,750 nga bili sa drugas nga makalasaw sa utok sa mga Bol-anon ang nasakmit sa mga tinugyanan.

Hinuon, kining tanan, pawong sa kadaku sa nasakmit sa hiniusang bahan sa Regional Drug Enforcement Unit7 ug sa Tagbilaran City Police Station niadtong Septembre 22, sa may las 8:35 sa gabii didto sa Purok 7, Brgy. Bool dinhi sa Tagbilaran City.

DIdto nasikop ang gika-intapan nga Regional High Value Individual nga si "Madam Gem," o si Gemuba Librada Alcala.

Sa gipahigayun nga inventory niadtong higayuna, mikabat sa 255 ka gramos nga shabu nga may gibanabana nga bili nga maobut sa P1.734 milyon ang nakuha sa buy-bust operation.

Tataw nga si "Madam Gem," wala gyud magpalupig diha nga sa pagsugod pa lamang sa buwan, duha ka regional high value individuals ang natibugsok usab sa buy-bust nga gipahigayun gihapon sa hiniusang bahan sa kapolisan sa syudad ug sa Regional Drug Enforcement Unit.

Niadtong Septembre 1, 2022, halos mag tungang gabii na diha nga sila si Erwin Ang alias Tabs ug si Zacarias Gonding mitunol ngadto sa pulis nga nagtakoban nga buyer, sa 220 ka gramos nga shabu.

Gibanabana nga P1.496 M ang kinatibuk-ang nasakmit nga drugas sa duha sa buybust nga didto mahitabo sa Purok 4, San Isidro, Tagbilaran.

Ang duha ka dagkong kaso sa buy-bust nga tataw gayud nga walay pyansa, mao na usab ang halos regular nga mabati, human napakurog na unta ang mga abusadong nagpatigayon sa drugas niadtong panahon ni kanhi Presidente Rodrigo Duterte.

Dala sa kahigawa sa PPOC, bisan pa nga naningkamot kini nga ikapatuman na gayud ang kampanya nga seryosohon usab sa mga katawhan sa Bohol, misaad si Aumentado nga dili gyud lugakan ang kampanya ug mangita pag laing mga pamaagi aron kubsan ang mga nagpasiaw. (RAHC/PIA7 Bohol)