CORTES, Bohol, Nov. 15 (PIA) -- Usa ka gatus ug kap-atan ug upat ka mga mountain bikers gikan sa lima ka age catagories ang nangandam na usab nga sukdon ang ilang kaugalingon sa lahutay sa pagsaka kanaug sa mga kabukiran sa Bohol sa ika tulo nga Bike ta Bai Epic Challenge, 2022 nga mahitabo karon Nobyembre 27 didto sa Punta Cruz Watchtower sa Maribojoc.

Gibuksan sa mga kategorya nga Open Elite, 20-29 years old, 30-39 years old, 40-49 years old ug 50 and above, ang epic langkuban sa team sa duha ka bikers: ang kapitan ug ang navigator.

Ang lumba, magasukad sa starting line sa Puntacruz sa alas 5:00 sa buntag, dayon mosugod sa dul-an sa usa ka gatus ka kilometros ug apilan sa duha ka biker sa usa ka team.

Ang duha, kinahanglan nga maghuwatanay, ug kinahanglan nga adunay kaugalingon nga mga gamit sap ag-ayo sa bisekleta kay dili sila mahimo mangayo og tabang sa mga wala moapil sa lumba.

Kinahanglan usab sa ilang navigator ang usa ka telepono nga adunay apps nga maoy sudlan sa mga organizers sa ruta sa lumba, ug dinhi usab matan-aw sa pagkatapos sa lumba kon wala ba sila masaag ug nangita og mubo nga ruta.

Gawas niana, seguradohon usab sa organizers nga ang matag team, adunay helmets, hydration bags alang sa tubig, duha ka ligwat sa ligid, mga tools pag-ayo sa bike lakip na ang  pang-ayo sa kadena, pagkaon, duha ka interior sa ligid, pangtapak, suga: headlight ug blinkers, bomba sa bisekleta, sumpay sa kadena, power bank ug cash engkaso kon may kinahanglan paliton.

P10 mil, P7mil ug P5 mil lakip na ang trophy ang premyo sa open elite samtang P6,500, P5 mil ug P4mil ang sa ubang kategorya.

Ang Bike ta Bail Epic Challenge mao nay giisip nga labing lisud nga lumba sa mountain bike dinhi sa Bohol, ug ang kasagarang maka lahutay niini, giisip na gayud nga mga bagtik, ilabi na kay kini magsapong sa mga layug nga bukid sa Maribojoc, Loon ug Calape, sa mga dalandalan ug cross country trails.

Ang lumba gibuksan usab alang sa mga kababayen-an, epic fun ride ug gravel ug cross country bikes.

Sa  ikatulo nga Epic Challenge, may mga bikers gikan sa Sugbo, Negros Oriental ug Leyte ang maingsalmot, kini samtang hinay usab nga gikulit sa Bohol ang iyang kaugalingong dapit sa sports tourism. (RAHC/PIA7 Bohol)