CORTES, Bohol, Nov. 14 (PIA) -- Sa 69 ka mga entries sa labing lami-an nga kape sa tibuok nasud nga  mingsalmot sa bangga sa de-kalidad nga kape, nakasulod sa ika 11 ang kape nga gikan sa Bohol.

Gani, sa minglabay nga 2021 Philippine Coffee Quality Awards, ang entry gikan sa Finca de Gabriela (Gabriela Estate) sa Candumayao, Catigbian, kape nga Robusta, nakit-an nga kapin sa katunga sa kadaghanon nga ilang giduso aron matimbang sa mga batid sa kape, giila nga Fine o labing maayong kalidad sa kape.

Kon makuha ang Fine nga grado sa kape, kana nagpasabut nga nahi-apil na sa labing taas nga matang sa tibuok kalibutan.

Ang medyo ubos og grado nga kape, kanang atong giila nga Premium, ug mahimo nan ga ibaligya sa gawas sa nasud.

Ang kasagaran nga grado sa mga kape, kanang gitawag og commercial o off-grade.

Sa presyo, ang labing mahal ang fine, sunod ang Premium ug ang Commercial.

Hinuon, matud pa ni Eric John Sese, tagdumala sa Finca de Gabriela, kuti nga trabaho ang iyang gibuhat kay subay sa iyang kasinati-an, ang kape, kinahanglan gyud nga kutihon og andam.

Sa tibuok Pilipinas, ang mga kape nga Arabica, o kadtong kape nga adto gipangtanum sa mga tag-as nga elevation sama Cordillera Autonomous Region ug sa Region 11 o sa mga lalawigan sa Davao diin igkita ang Mount Apo.

Dinhi nga mga lugara, ang bugnaw nga panahon, magpadugay sa pagkahinog sa bunga sa kape, mao nga motuhop dinhi ang mas daghang nutrina alang sa medyo tam-is sa tagamtam nga kape nga may kaugalingong lami.

Ang Arabica, kasagaran maoy giisip nga maayong klase sa kape.

Sa laing bahin, ang Robusta, motubo sa mga ubos nga elevations, ug kay medyo init dinhing dapita, mas dali kining mahinog, mao nga kini ang giisip nga kape ngamas pait, ug mas daghang caffeine.

Ang Robusta sa Finca de Gabriela, anaa na ubos nga elevation apan nakasulod pa gihapon kini sa labing piskay.

Alang kang Sese, ang paggamit sa organic nga paagi sa pagpananum sa kape, ug ang metikuloso nga pagpamupo sa unsay angayan pupo-on, ang kuti nga pagpili sa liso nga iproseso ug ang pagtipig niini sa sakto nga tipiganan sa dili pa sangagon, daku ug ikatabang sa pagpabilin sa lami  sa kape ug sa mga matagamtam nga lam inga ania niining kapeha.

Ang Kape sa Finca de Gabriela, matud pa sa mga naghimo sa cupping ug mga tighukom, may lam isa tsokolate, caramel, mga panakot, lomboy ug nga prutas nga anaa sa iyang palibot.

Ang Kape sa Finca de Gabriella mahimong matilawan sa mga nag-una nga third wave coffeeshops sa Tagbilaran City. (RAHC/PIA7 Bohol)