TAGBILARAN CITY, Bohol, Dec. 19 (PIA) -- Gilagdaan tali sa Department of Tourism (DOT) ug sa local nga kagamhanan sa Dauis ang usa  ka Memorandum of Agreement nga magtugot sa DOT sa pagtukod og Tourist Rest Area (TRA) sa Poblacion sa lungsod nga mahimong one stop shop sa mga turista nga mosuroy sa Bohol.

Ang DOT pinangulohan ni Kalihim Christina Garcia Frasco, ug  ang Dauis, nga girepresentahan ni Mayor Roman Bullen, milagda sa katukoran sa nahisgutang pasilidad, usa sa napulo nga tukoron sa DOT sa lukop Pilipinas.

Kini human usab gihimo ang ground breaking ceremony sa nahisgutang pasilidad nga tuloron kilid mismo sa tennis court sa Poblacion Dauis.

Ang TRA, usa ka pasilidad nga mahimong hunongan ug dali nga pahuwayan sa mga turista ug may probisyon sa limpyo, hamugaway ug uga nga comfort rooms, information center nga may kasayuran sa tanan nga mga lugar suroyanan sa Bohol ug may dyutay nga pasalubong center aron pamalitan sa mga turista sa mga gasa nga buot nila nga iuli.

Una na nga natukod sa Monolo Fortich sa Bukidnon, ug sa Davao Oriental, sa Medellin ug Carmen sa Cebu, sa Roxas sa Palawan, sa Ilocos ug karon dinhi sa Bohol, ang TRA usa  ka pagmatuod nga ang Administrasyon ni Presidente Ferdinand Marcos Jr., seryoso sa iyang kampanya  nga himoong ang Pilipinas nga star sa turismo, pinaagi sa paghatag og dugang pang mga gahum sa mga local nga kagamhanan.

Ang paglagdaay sa MOA sa bag-ong pasilidad gihimo dayon sa sulod sa Municipal Gymnasium, pipila ka lakang gikan sa lugar diin tukoron ang nahisgutang pasilidad.

Ang paglagdaay sa MOA gisaksihan nila ni Gobernador Erico Aristotle Aumentado, Kongresista Vanessa Aumentado, Kongresista Edgar Chatto, Bise Gobernador Victor Dionisio Balite, sakop sa Sangguniang panlalawigan ug mga mayor ug bise mayor sa Bohol.

Didto usab uban sa kalihin sa DOT ang mga labaw nga opisyales sa ahensya, aron, matud pa ni Frasco, ipakita sa katawhan nga ang DOT seryoso sa pagpatuman sa kabubot-on ni Presidente Marcos nga himoon ang Pilipinas nga star sa turismo sa rehiyon.

Gawas sa ground breaking sa TRA ug paglagdaay sa MOA kabahin niini, si Frasco ug mga kaubanan misubay sa kabaybayonan sa Alona sa Panglao, aron susihon ang gikataho nga mga suliran didto.

Si Architect Socrates Fucanan ug si Uco Trotin, kinsa maoy mipresentar sa laraw sa pagpahiuli sa beachfront sa Alona mipasabut sa kahilim ug mga opisyales sa ilang plano sa pagpaugmad sa baybayon sa Alona, pinaagi sa pagpaguba sa mga esktraktura nga nakaingon nga dili na mopundo ang bonbon.

Ila usab nga gisugyot ang P70M nga laraw sa pagsuyop sa mga bonbon nga nangatagak sa kantil nga anaa sa atubangan sa Alona aron ibalik kini pagbuga aron mihiuli ang kanindot sa kabaybayonan. (RAHC/PIA7 Bohol)