TAGBILARAN CITY, Bohol, Dec. 28 (PIA) -- Minglusad ang Department of Information and Communications Technology (DICT) niadtong Martes og 24/7 complaint center diin ang publiko maka-report sa mga isyu kalabot sa pagparehistro sa SIM card.

Ang tigpamaba sa DICT ug Undersecretary Anna Mae Lamentillo miingon nga ang unang duha ka semana sa pagpatuman sa SIM registration gikonsiderar nga test period.

Pipila ka mga problema o teknikal nga isyu ang gilauman samtang ang mga public telecommunications entities (PTEs) nagpahimutang pa sa ilang mga proseso.

Matud pa ni Lamentillo nga ang unang 15 ka adlaw sugod sa Disyembre 27 maoy panahon sa pagsulay. Kini nagpasabot nga ang mga rehistrasyon niining panahona balido ang tanan, apan gilauman usab nga adunay pipila ka mga kalisud tungod kay kini nga proseso bag-o alang sa mga subscriber ug sa mga PTE. Niining 15 ka adlaw nga panahon sa pagsulay, ang mga PTE makahimo sa pagtimbang-timbang kung unsa ang ilang kinahanglan nga pauswagon aron mahimo ang proseso sa pagrehistro nga mas episyente ug dali alang sa mga subscriber.

Ang 24/7 complaint center magsilbi nga support system sa pagpatuman sa SIM registration tungod kay maghatag kini og plataporma diin ang mga subscribers sa SIM maka-report sa ilang mga reklamo o makahatag og mga sugyot kon unsaon pagpauswag sa proseso.

Ang complaint center alang sa pagparehistro sa SIM ipailalom sa Cybercrime Investigation and Coordinating Center, usa ka attached agency sa DICT.

Ang mga reklamo nga adunay kalabotan sa pagparehistro sa SIM mahimong idirekta kanila pinaagi sa hotline 1326. (ECB/PIA7 Bohol)