TAGBILARAN CITY, Bohol, Jan. 10 (PIA) -- Walay pagduhaduha sa bahin ni Bohol Provincial Police Office (BPPO) director Colonel Lorenzo Batuan sa panawagan ni Secretary Benjamin Abalos Jr. sa Interior and Local Government (SILG) alang sa tanang hingpit nga koronel ug heneral sa Philippine National Police ( PNP) nga mosumiter sa ilang courtesy resignation.

Gikumpirmar ni Batuan niadtong Lunes nga opisyal niyang gisumiter ang iyang resignation niadtong Biyernes sa miaging semana uban sa bag-ong gitudlo nga PNP Central Visayas director Brigadier General Jerry Bearis, laing brigadier general ug 27 ka mga koronel sa rehiyon.

Ang nag-inusarang full police colonel sa Bohol niingon nga nagtuo siya nga duna gyuy mga top brass police officials nga nalambigit sa illegal drug trade.

Dugang pa ni Batuan nga ang proseso posibleng mosangpot sa pagpasaka og kaso batok sa pipila ka mga opisyal sa kapolisan.

Matud niya nga hangtod karon wala pa siyay nadawat nga impormasyon nga nagtumbok nga may nalambigit sa ilegal nga drugas sa mga polis nga ubos sa iyang kamandoan.

Sigun pa sa labing taas nga pulis sa probinsiya, nagpabiling taas ang moral sa lokal nga kapulisan ug wala maapektuhi sa mass courtesy resignation.

Matud pa niini nga padayon silang mohupot sa ilang tagsa-tagsa ka pwesto samtang nagpaabot sa evaluation nga ipahigayon sa five-man committee.

“E-evaluate ang amoang record then the instruction is to maintain our present designation so naay status quo until such time na mo gawas ang resulta sa ilang pagahimuon nga investigation,” matud pa ni Batuan.

Si Abalos, sa usa ka press briefing niadtong Miyerkules, nihimo sa panawagan isip “radical approach” sa paglimpyo sa organisasyon sa mga nalambigit sa ilegal nga druga.

Gihimo kini sa rekomendasyon usab ni PNP Chief Gen. Rodolfo Azurin Jr., subay sa kompirmasyon ni Senador Ronald dela Rosa sa presensya sa mga “ninja cops” sa kapolisan. (ECB/PIA7 Bohol)