TAGBILARAN CITY, Bohol, Jan. 6 (PIA) -- Nipasidaan ang Department of Health (DOH) batok sa mga mensahe nga nag-link sa DOH Department Memorandum No. 2022-0578 aron ipakaylap ang dili tukma nga kasayuran sa mga sintomas sa Omicron XBB subvariant.

Ang nasangpit nga dokumento giisyu aron pakusgon ang surveillance activities taliwala sa nagkataas nga kaso sa Covid-19 sa gawas sa nasud.

Sa kinatibuk-an, ang COVID-19 nagpakita sa mga sintomas sa trangkaso sama sa  hilanat, ubo, kakapoy, pagkawala sa panlasa o panimhot, sakit sa tutunlan, labad sa ulo, sakit sa lawas, kalibanga ug uban pa, matud pa sa gipagawas nga advisory sa DOH.

Tambag pa sa ahensya nga alang sa saktong pagdayagnos sa mga simtomas, angay nga magpakonsulta sa doktor o moadto sa pinakaduol nga pasilidad sa panglawas.

Ug aron malikayan ang dugang nga transmission sa COVID-19, gitambag sa DOH nga ipadayon ang pag-obserbar sa saktong sanitasyon, masking, distancing, ug maayong bentilasyon.

Dugang pa, gitumbok sa ahensya nga ang pagbakuna nagpabilin nga labing maayo nga depensa batok sa grabe nga COVID-19.

Ang DOH nagpadayon usab sa pag-awhag sa publiko sa pagkuha sa impormasyon gikan lamang sa mga lehitimong tinubdan ug mga plataporma, nga ma-akses pinaagi sa opisyal nga mga link ug social media handle sa ahensya.  (ECB/PIA7 Bohol)