TAGBILARAN CITY, Bohol, Jan. 19 (PIA) -- Way pagmakuli sa pagpalusot ang Provincial Peace and Order Council (PPOC) sa Bohol niadtong labing uwahi niining tigum ang programa sa paghiusa sa kapulisan, simbahan ug katawhan nga mas nailhang KASIMBAYANAN, alang sa lalawigan sa Bohol.
PInaagi sa en masse resolution, nga gipasiugdahan sa Philippine National Police Bohol Police Provincial Office pinaagi ni Bohol PNP Chief Colonel Lorenzo Batuan, napalabang ang walay pagsupak nga suporta sa Bohol sa KASIMBAYANAN, nga usa ka holistic ug dynamic approach sa pagpatunhay sa pagtamud sa balaod ug sa konstitusyon.
Sa nasudnong paglusad sa gipabuhi nga KASIMBAYANAN, nagsalig si Chief PNP General Rodolfo Azurin nga ang habig sa tawo nga impluwensya sa tinuohan o relihiyon, may daku og ikaabag sa pagpalugwa sa labing nindot nga kinaiya sa katawhan sa pagpatunhay sa balaod kay kini makatuhop sa kasingkasing ug hunahuna nga maoy moral nga giya sa kapolisan.
Sa laing bahin, ang pagpalig-on sa nasudnong polisya, magsugod sa pulis nga linghod og hunahuna, nagmahal ug nagtahod sa iyang banay, mitahod sa isig ka tawo, mag kahadlok sa Diyos, may paglaban sa nasud ug matuod sa serbisyo.
Kining tanan, mahimong mapamaayo pinaagi sa Kasimbayanan, nga naghatag og importante nga papel sa paghiusa ug pagtinabangay sa nagkadaiyang sanga sa goberno, ug mga sector sa katilingban aron ikapatuman ang mas malampuson nga kaayohan sa kadaghanan.
Gilusad niadtong Septembre 2022, daghan na ang accomplishment sa kapolisan sa Bohol sa natad sa Kasimbayanan, segun pa ni Lt Col Joseph Berondo ngadto sa mga sakop sa PPOC.
Lakip na niini ang pagpakigtagbo sa mga pundok nga nagbase sa pagtuo, mga pundok nga may mga buhing adbokasya sa kahusayg kalinaw, pagpakigtagbo sa mga opisyales ug katawhan sa barangay, mga opisyales sa lungsod, pagsagop sa Community Oriented Policing System, pagpatuman s amga proyekto kauban ang mga katawhan, pagbisita sa mga eskwelahan, paghatag og lectures batok sa illegal nga drugas, senemana nga tigum sa mga barangay, paghatag sa mga kapanginabuhian, scholarships, libre nga medical dental services ug uban pang proyekto.
Matud sa Kampo Dagohoy, tungod sa Kasimbayanan, pagpatuman sa ending local communist armed conflicts ug simultaneous anti-crime and law enforcement operations, napugngan pa ang mga komunista sa pagpangampanya og balik aron makuha ang kanhi nilang mass based organizations ug mga tigsuporta. (RAHC/PIA7 Bohol)
