GENERAL SANTOS CITY (PIA) -- Nagpahimangno sa publiko ang Commission on Elections (Comelec) nga walay laomang ekstensiyon sa kasamtangang ginapahigayong voters registration nga gisugdan katong Disyembre 12, 2022 hangtod sa Enero 31, 2023.
Sumala pa ni Comelec Chairman George Erwin Garcia bukas ang tanang buhatan sa Comelec sa tibook nasud gikan Lunes hangtod Sabado ug wala matud pay rason nganong dili makapa rehistro ang mga kwalipikadong lumulupyo.
Dugang pa ni Garcia duna matud pay mga gibuhat nga lakang ang Comelec aron sa igong pagpahibalo sa katawhan mahitungod niining voters registration ug dili matud pa maayo nga mag sige’g sibog kung duna’y gitakdang deadline.
Apan kipaklaro niini nga naay mga lugar kung asa gi suspende sa Comelec ang pagpa rehistro tungod sa baha ug mamahimo silang makahatag ug ekstensiyon sa susamang klaseng sitwasyon.
Samtang, giawhag ni Garcia ang publiko nga mogawas ug magpa rehistro isip botante aron mabansay ang ilahang katungod sa moabot nga Barangay ug Sangguniang Kabataan Elections (BSKE) karong Oktubre.
Sa kasamtangan, mokabat na sa 1,028,000 ang kinatibok-ang ihap sa mga nagpa-rehistro. Nagpadayag ug pagdahum ang naasoy’ng opisyal nga maka- rehistro ang ahensya ug 1.5 milyon hangtod 2 milyon indibidwal sa tibook voting period. (PGFruylan/PIA-Gensan)
