TAGBILARAN CITY, Bohol, Jan. 23 (PIA) -- Ang ASEAN Working Group on Intellectual Property Cooperation (AWGIPC) mipili sa Bohol isip host sa ilang ika-69 nga miting karong tuiga.

Si Gobernador Erico Aristotle Aumentado nipahibawo niini sa iyang social media nga ang probinsiya maoy mo-host sa tinuig nga tigom sa Marso karong tuiga, nga iyang gihulagway isip usa ka dakong kahigayonan aron mapakita ang Bohol sa tibuok kalibotan.

Nakigtagbo ang kagamhanang probinsiyal sa Bohol kang Undersecretary Rowel Barba, ang Director-General sa Intellectual Property of the Philippines (IPOPHL), niadtong Biyernes, Enero 22, aron ipahibalo ang pagpili ug pormal nga mohimo og koordinasyon alang sa umaabot nga kalihokan.

Kauban ni Gob. Aumentado, isip kabahin sa coordinating team sila si Provincial Administrator Asteria Caberte, Special Projects Head Metodio Maraguinot Jr., ug Center for Culture and Arts Development Head Atty. Filipina Piollo.

Gilauman sa Bohol nga mo-host sa mga delegado gikan sa rehiyon sa ASEAN, European Union, Japan, South Korea, United Kingdom, ug sa World Intellectual Property Organization.

Gipaabot nga motambong si Department of Trade and Industry (DTI) Kalihim Alfredo Pascual sa AWGIPC meeting karong tuiga. Ang IPOPHL usa ka attached agency sa DTI.

Ang AWGIPC meeting gihimo matag tuig sukad sa pagkatukod niini niadtong 1996, diin ang mga representante gikan sa matag usa sa ASEAN IP offices ug ang sectoral group nga responsable sa mga isyu sa IP sa rehiyon magtagbo aron hisgutan ang mga katungod sa intelektwal nga kabtangan sa Southeast Asia ug pagpalambo sa mga palisiya sa rehiyon nga may kalabutan niini. (ECB/PIA7 Bohol)