TAGBILARAN CITY, Bohol, Jan. 23 (PIA) -- Nunot sa tumong nga maghimo og kisaw alang sa sports tourism, tuyo nga gipukaw dungan sa pagsaulog sa Chinese New Year, and nahikatulog nga dragon boat racing dinhi sa Bohol.

Mismo is Dr Theodore Dumaluan, uban ni Modala Beach Resort Vice President for Operations ug General manager Rommel Gonzales, Antonio Amora Jr isip representante ni Gobernador Erico Aristotle Aumentado, si kanhi Usec Art Evangelista ug nga representante sa civil society ang mihimo sa symbolic nga pagpukaw sa dragon head sa dragon boat sa usa  ka seremonyas didto sa Modala Resort sa Panglao.

Matud ni Dr Dumalu-an, ang dragonboating sa Bohol nakalahutay na sulod sa 13 ka tuig apan napadaplin sa milabay nga mga katuigan tungod sa mga pagdili dala sa sakit nga COVID.

Ang Bohol, maoy giisip nga duyanan sa dragon-boating sa Central Visayas, ug saysay pa ni Dumalu-an, ang Bohol mao na ang nagpasugod sa ma dragonboat teams sa Sugbo kay aduna kini gamit ug wala magsalig sa nasudnong tig-pasiugda aron maghimo sa mga paduwa ug mga programa aron ugmaron ang grassroots nga mga mamugsayay.

Gani, dugang niya nga ilang gikalipay nga ang Sugbo nakahimo na og sika nga dragonboat team nga gilangkoban sa mga mamugsayay nga pulos adunay kabilinggan.

Ang PADS o Philippine Accessibility Dragonboating Services (PADS) gilangkoban sa mga bakol, may suliran sa panan-aw ug may kabilinggan apan pwede pa nga makabugsay.

Tungod sa pandemya, napaundang ang dragon boating apan gipabalik kini sa iyang popularidad dala sa bag-ong glow in the dark dragonboat races dinhi sa K of C Drive magabii.

Kap-os sa pandemya, subay usab sa pangampanyag balik sa mga lumilihok sa turismo sa pagpang-engganyo sa mga turista nga mobalik sa Bohol, gipukaw na ang nahikatulog nga dragon.

Si Rommel Gonzales kinsa maoy president usab sa Bohol Association of Hotels, Resorts ug Restaurants mipaambit nga buot nila nga himoon ang matag buwan nga dagkong sports toursm nga mga kalihukan aron sa pag-agni sa mga turista nga moduyog sa mga kasadya.

Libo-an ka mga dragon boat teams sa tibuok kalibutan ang naa nagpaabut na lamang nga imbitaron aron moanhi, butyag pa ni Dumaluam, kang kinsa nga Bohol Paddlers Association Incorporated (PBAI) na affiliate sa nasudnong pederasyon sa dragonboating sa nasud.

Kaniadto, maikog kita nga mangimbitar sa mga dragon boat teams tungod kay wala kita’y igo nga pasilidad, dayag sa doctor nga paddler nga taga Panglao.

Sulod sa milaby nga napuklo ug tulo ka tuig  ilabi na sa panahon sa pandemya, nakapatukod na usab og liboan ka mga rooms sa mga hotels ug resorts sa Bohol, mga pasilidad nga magamit nga kapuy-an sa mga pundok sa dragonboaters nga moanhi unya.

Ang usa  ka dragon boat crew mahimong moabut sa 22, ngadto sa labing gamay, ug maglumba sa dinungan nga pagbugsay aron mas mapatulin ang sakayan.

Sa umaabut nga Hulyo himoon ang international dragon boat festival dinhi sa Bohol, segun pa ni Gonzales.

Samtang mahitabo kini, himoon sa mga local organizers sa dragonboatings a Bohol ang ginagmay nga mga lumba nga apilan sa mga kalungsuran aron mapili ang mga potensyal nga mga paddlers nga molangkob sa team Bohol sa umaabot nga lumba.  (RAHC/PIA7 Bohol)