TAGBILARAN CITY, Bohol, Feb. 7 (PIA) -- Walay labing datu sa tibuok kalibutan nga makakaya og tabang sa tanang nanginhanaglan, samtang ang tanan mahimong makatabang sa gagmay nga paagi sa mga nanginahanglan.
Kini ang dugokan karon sa gipahigayon nga tinabangay nga nahitabo alang sa balay sa usa ka byuda nga may 10 ka anak kansang hinatag nga Balay sa Gugma, naguba sa bagyo ug dili makasarang sa pagpasilong sa mga gagmay pa nga bata.
Sa tampohay sa mga tawo nga may maayong kabubot-on ug sa tabang sa mga may abilidad sa pagpamanday, napaayo ang balay ug napun-an og extension nga kwarto ang balay ni Glowelinda Canillo, sa Cambangay Norte, San Miguel Bohol.
Aktibo usab nga mingtabang pinaagi sa ilang programang Kasimbayanan ang San Miguel Police Station pinaagi ni Police Lieutenant Ponciano Entroliso Jr., kauban sila Police Executive Master Sergeant Manuel Tupos, Police Chief master Sergeant Philip Polinar ug Police Master Sergeant Michael Guimarangan nga mingsungasong sa uwan aron makatabang sa pag-pahiluna sa atup sa balay nga gitabanagan.
Matud ni Cambangay Norte Barangay Chairman Roger Ibaoc, bag-o lang nabyuda ang tagbalay ug may gibilin nga 6 pa ka buwan nga kamanghuran, ug wala gani klaro nga pangita ang inahan, kinsa magtabang ra og pangani aron may makaon.
Naabtan sa team sa Kasimbahayan ang guba ug nanginahanglan og extension nga balay sa byuda nga si Glowelinda Canillo, may 10 ka anak, kadaghanan niini, gagmay pang bata. Maghuot ang 8 ka mga bata sa usa ka lantay, ug ang dili masarang, adto higda sa sala nga semento ang sawog ug maghapin lang og karton dayun banig nga walay habol. (PIA Bohol)
Si Kapitan Ibaoc, kauban sa tulo ka sakop sa Konseho sa Barangay nga pulos usab mga panday, minghatag sa libre nga pagtrabaho aron maaptan, masawgan ug mabongbongan ang extension nga maoy himoong kwarto sa mga bata.
May minghatag og 10 ka plego nga sin atup, 10 ka amakan, mga kahoy, plastic nga baril kapundohan sa tubig ug mga lansang aron matrabaho ang balay.
Daku usab ang tabang sa mga mountainbikers sa San Miguel nga gihiusa ni Jim Reposposa, community health nurse ug biker, sa pagtapok ug pagpas-an sa mga materyales ngadto sa tugkaran sa balay nga tukoran.
Sa laing bahin, ang mga kasilinganan usab mipaambit sa mga pagkaon ig pamainit sa mga panday nga naglibre sa ilang trabaho.
Humans a tulo ka adlaw nga pagtrabaho bisan sa kusog nga uwan, may kapasilongan nga ang mga bata ug nakuhaan na og usa ka suliran ang byuda kay dili na manhigdan ang iyang mga anak sa semento nga sawog. (RAHC/PIA7 Bohol)
Human makahinabi ang tagbalay, nahukman sa mga mingboluntaryo sa Kasimbayanan nga tukoran og extension ang balay, sawgan aron mas luwas ang mga bata sa sakit ug butangan og yano nga rainwatrer collection system aron duna na silay limpyong tubig mainum. (PIA Bohol)
