LUNGSOD QUEZON, (PIA) -- Matapos ang matagumpay na paglulunsad ng BIDA Bayanihan ng Mamamayan Fun Run at Serbisyo Caravan kasama ang may16,245 BIDA advocates na tumakbo at sumuporta kahapon, nanindigan si Department of the Interior and Local Government (DILG) Secretary Benjamin ‘Benhur’ Abalos, Jr. sa tuloy-tuloy na kampanya laban sa iligal na droga sa ilalim ng Buhay Ingatan, Droga'y Ayawan (BIDA) ng kasalukuyang administrasyon.

"The government is hell-bent at curtailing the proliferation of illegal drugs in the country. Tuloy-tuloy ang cleansing of our ranks at case build-up laban sa mga pulis na sangkot sa iligal na droga. Tuloy-tuloy rin ang panghuhuli natin, pero ang maganda ay sabay ang demand reduction efforts natin. Kapag gumagalaw ang pamilya, ang mga barangay. It's a whole -of-nation approach," ani Abalos.

Ayon sa Kalihim, sama-samang nakikiisa ang mga ahensya ng pamahalaan katuwang ang iba't ibang sektor ng lipunan sa iisang layunin na putulin ang pagkalat ng iligal na droga sa bansa partikular sa demand reduction nito.

“We know this is a global problem. Itong araw na ito, nagpapatunay na hindi lamang ang PNP at PDEA ang lumalaban sa droga. Lahat tayo may papel, sama-sama tayong mananalo sa droga. Together, we will show that Philippines is against drugs," aniya.

Nagpapasalamat din si Abalos sa higit 16,000 na nakiisa at tumakbo sa BIDA Fun Run ngayong umaga sa Block 16, Mall of Asia, Pasay City kasabay ang pag-anyaya sa mga runners na makinabang sa mga serbisyo ng pamahalaan sa BIDA Serbisyo Caravan.

"The support we are getting for the BIDA Program is truly overwhelming. Salamat sa pagsama sa amin sa fun run. We hope you are also able to take advantage of the services catered by our caravan," ani Abalos

Sinabayan  ni Abalos ang mga BIDA runners sa pagtakbo ng 10 kilometro habang ang iba ay tumakbo naman ng lima at tatlong kilometro sa nasabing fun run.

Dumalo sa Fun Run at naghayag ng suporta si Pasay City Mayor Imelda Calixto-Rubiano, Vice President for Commercial Properties-SM Prime Holdings Antonio  Felix L. Ortiga, at mga opisyal ng DILG.

Nagpahayag din ng suporta ang iba’t ibang pamahalaang lokal at mga ahensya ng gobyerno gaya ng Sangguniang Kabataan, Philippine National Police Academy, National Youth Commission, Philippine Public Safety College at mga kinatawan mula sa faith-based organizations at pribadong sektor kasama ang Catholic Bishops’ Conference of The Philippines at Federation of Ulama and Imam-NCR; mga BIDA ambassadors gaya nila Candy Pangilinan, Romnick Sarmiento at JC Tiuseco at mga social media influencers.

"Galing kami sa iba-ibang rehiyon ng bansa. Kaya namin ginagawa ito ay para wala nang buhay pa ang masisira dahil sa droga," ani Abalos.

Ayon  sa Kalihim, sa huling datos ng Dangerous Drugs Board, mayroong 1.8 milyon Pilipino ang gumgamit ng iligal na droga at 4.8 milyon naman ang sumubok gumamit nito.

Sinabi niya na ang BIDA Bayanihan ng Mamamayan Fun Run ang isa lamang sa mga gawain na ilulunsad ng pamahalaan sa ilalim ng BIDA program. Aniya, maglulunsad pa ng iba’t ibang inisyatibo ang pamahalaan sa ilalim ng nasabing programa upang patuloy na mahikayat ang mga mamamayang labanan at iwasan ang iligal na droga.

Inilunsad ang BIDA program noong nakaraang taon na gumagamit ng multi-sectoral approach upang pagtibayin ang laban sa droga sa pamamagitan ng tatlong pillars: (1) prevention; (2) law enforcement; at (3) penology, rehabilitation, and reintegration.

BIDA Serbisyo Caravan

Pinangunahan din ni Abalos ang pagbubukas ng BIDA Serbisyo Caravan na tampok ang iba't ibang serbisyo ng ahensya ng pamahalaan matapos ang matagumpay na fun run.

“Malaking tulong ang one-stop caravan na ito para maging abot-kamay para sa ating mga kababayan ang serbisyong kailangan nila sa atin. Kaya naman nagpapasalamat ako sa lahat ng kasama nating government agencies ngayon,” ani Abalos.

Nagpasalamat siya sa serbisyong inihandog ng iba’t ibang ahensiya ng pamahalaan kasama ang Philippine National Police-National Capital Region Police Office (PNP-NCRPO), Bureau of Jail Management and Penology (BJMP)-NCR, National Bureau of Investigation (NBI)-NCR, National Police Commission (NAPOLCOM)-NCR, Department of Social Welfare and Development (DSWD)-NCR, Department of Agriculture-Bureau of Plant Industry (DA-BPI), DA-Kadiwa, Department of Health (DOH), Department of Trade and Industry (DTI) NCR, Dangerous Drugs Board (DDB), Department of Labor and Employment (DOLE)-NCR, Maynilad, Department of Information and Communications Technology (DICT), Philippine Statistics Authority (PSA)-NCR, Civil Service Commission (CSC)-NCR, National Telecommunications Commission (NTC), at National Commission on Muslim Filipinos (NCMF), DILG-NCR, Bureau of Fire Protection-NCR, Philippine Commission on Women, Philippine Drug Enforcement Agency-NCR, Philippine Health Insurance Corporation at Pasay City Public Employment Service Office.

Ilan sa mga serbisyo ng pamahalaan sa nasabing caravan ay NBI clearance application; PhilSys registration at e-Phil ID printing; SIM registration; Business Name registration; pag-issue ng kopya ng birth certificate, at assistance desk para sa mga mayroong problema sa kanilang birth certificate at civil registration. (dilg/pia-ncr)