GENERAL SANTOS CITY (PIA) -- Nagpadayag ug dakung pasalamat si Bise Presidente Sara Duterte-Caprio sa imbitasyon nga gibuhat sa lokal nga panggamhanan sa dakbayan kung asa nahimo kining Guest of Honor sa culmination ceremony sa 34th Kalilangan Festival ning adlaw’ng Lunes, Pebrero 27. 

Matud pa niini tungod sa naasoy’ng imbitasyon nahatagan kini ug higayon nga motindog sa atubangan sa mga lumulupyo ug bisitang nitambong sa maong aktibidad aron magpasalamat sa tanang tabang ug suporta sa kampanya ug eleksyon niini ug ni Pangulong Bongbong Marcos tong nilabay’ng tuig. 

Segun pa sa bise-presidente, nagpadangat si Pangulong Marcos ug mainitong pagtimbaya sa pagsaulog sa syudad sa Kalilangan Festival. 

Dugang pa niini mapasalamaton gayod ang pangulo sa tabang sa mga taga Gensan dili lamang sa kadaugan niini apil sab ang nadawat niining suporta sa 8-point socioeconomic agenda sa administrasyon. 

Samtang, wala sab gikalimtan sa bise-presidente ang paghatag ug pasalamat sa suporta sa katawhan sa pamilya Duterte labina sa amahan niining si kanhing Pangulong Rodrigo Duterte. 

“Ang katapusang pagpasalamat mao ang amoang pagpasalamat gikan sa pamilya Duterte sa oportunidad nga ginahatag ninyo sa amoang pamilya. Daku ang amoang utang na kabobot-on kaninyong tanan sa inyohang ginahatag na oportunidad sa amoa na maka silbi as in national positions. Thank you mga taga Gensan gikan sa amoang pamilya. Sa unom ka tuig nga suporta ninyo sa administrasyon ni Pangulong Rodrigo Duterte maraming-maraming salamat sa inyong lahat.” (PGFruylan/PIA-Gensan)