PUERTO PRINCESA, Palawan (PIA) -- “Walang [oil] spill sa Palawan, yes, sa Mindoro pa, we are expecting base dito sa Model ng UPMSI that ‘yong drip ng possible spill is by March 7 darating sa vicinity ng Agutaya at Cuyo.”

Ito ang sinabi ni Philippine Coast Guard-Palawan District Commander Dennis Rem C. Labay sa media briefing nitong Marso 6 na isinagawa sa kanilang headquarters kaugnay ng naganap na oil spill sa Naujan, Oriental Mindoro dahil sa paglubog ng MT Princess Empress kamakailan.

“As of now, walang [oil] spill doon and this morning with the help from WESCOM and TOW West, yung officer natin na si Lt. Villacillo sumama doon sa aerial survey and based doon sa aerial survey nila this morning wala silang nakitang oil or any traces of oil na papasok sa area ng Palawan,” pahayag pa ni Commander Labay.

Aniya, sa prediksyon ng Marso 12 dapat nasa area na ng Araceli, Dumaran pababa pero hindi pa ito nangyayari at inaasahan na hindi ito mangyayari.

May mga ulat din aniya na nakuha sa Brgy. Concepcion at Brgy. Algeciras at ang oil na nakita nila doon ay yung galing sa mga basura kung saan dumikit ang oil.

Kailangan din aniyang masuri kung magkapareho nga ba ang oil na nakita sa Agutaya sa oil spill sa Mindoro.

“Yung oil na nakolekta nila doon sa  beach area, collectively kung pag-iisahin mo hindi aabot ng  one liter, so napakaliit  at hindi pa natin ito masasabi na oil spill,” dagdag na pahayag ni Commander Labay.

May contingency plan na rin aniya ang PH Coast Guard kapag may ganitong insidente, tulad ng paggamit ng bunot na ginagawang parang spill boom para doon dumikit ang oil at hindi ito lulusot.

May dispersant na rin na ipinadala sa bayan ng Cuyo na maaaring magamit kung sakaling umabot sa nasabing lugar ang oil spill.

Tuloy-tuloy din aniya ang pag-inspeksyon ng mga coast guard station sa mga munisipyo sa mga beach area na maaaring maapektuhan ng oil spill, tulad ng Cuyo, Magsaysay, Agutaya, Coron, Culion, Linapacan at Dumaran. (OCJ/PIA MIMAROPA)