TAGBILARAN CITY, Bohol, March 14 (PIA) -- Magpahigayon og media literacy campaign batok sa fake news ug disinformation ang gobyerno ilabi na sa digital landscape ug social media.

Matud pa ni Presidential Communications Office (PCO) Undersecretary Cherbett Karen Maralit, tumong sa kampanya nga tabangan ang “most vulnerable communities” aron magbaton og igong kahibalo ug katakos sa pag-ila sa kamatuoran samtang sila nakigbahin sa lain-laing mga social media channels ug mga plataporma.

Gipasabot sa opisyal sa PCO nga kining kampanyang himuon sa “context-based and factual grassroots approach,” dungan sa aktibong kolaborasyon sa PCO ug pribadong sektor partikular na ang mga anaa sa media.

Matud pa ni Maralit nga magtrabaho ang PCO aron mapauswag ang katakus sa mga lungsuranon sa paghunahuna nga kritikal ug pag-analisar sa kasayuran.

Ang una nga lakang padulong niini nga katuyoan mao ang pag-ila sa kasaligan ug katuohan nga mga gigikanan sa kasayuran

“Backed by the budgetary support from the Philippine Congress and its confidence in the leadership of the PCO, we took the opportunity to develop mechanisms through which we can bring the online experiences of females of all ages into focus. 

Gipaluyohan sa suporta sa badyet gikan sa Kongreso sa Pilipinas ug sa pagsalig niini sa pamunoan sa PCO, among gipahimuslan ang kahigayonan sa pagpalambo sa mga mekanismo.,” matud pa ni Maralit.

Gidugang pa sa opisyal sa PCO nga magpahigayon pa og mas makuting pagtuon karong buwan aron matumbok  ang mga komunidad sa nasud nga pinaka-nanginahanglan og media literacy; social media platforms nga nakapangbiktima nila og fake news; ug masayran ang mga topic nga kasagarang sakop sa misinformation ug disinformation.

Matud pa niini nga kun mauban ang tanang pagtuon, gilaumang ipahigayon na ang nasudnong kampanya ug media literacy summit sa pagtapos ning tuig. (ECB/PIA7 Bohol)