TAGBILARAN CITY, Bohol, Marso 7 (PIA) -- Mas importante pa gihapon ang paglikay sa sunog kay sa pagpatay niini.

Kini maoy giluwatan nga pamahayag ni Bureau of Fire Protection (BFP) Senior Fire Inspector Servando Jumawid, Marso 7, didto sa Kapihan sa PIA, sa paghandum sa Marso isip Buwan sa Paglikay sa Sunog (Fire Prevention Month). 

Gani, bisan sa maayong balita nga tanan na nga lungsod sa Bohol may napabarug nga estasyonan sa kabomberohan ug may sakto nga komplementaryo sa mga bombero nga nagpuli-puli og duty tanang oras ug labing menos usa  ka fire truck nga andam kanunay moresponde, gipadayag gihapon sa opisyal sa Provincial Fire Station ug hepe sa kabomberohan sa Dauis nga, kon masunog na, dako nag posibilidad nga ma-abo ang tinuguman sulod sa kritikal nga minutos sa pag-ulbo sa kayo.

Ug sa   ka daku sa panginahanglan nga pugngan gyud ang kahigayunan sa sunog, gidason sa opisyal nga "Sa pag-iwas sa sunog, di ka nag-iisa," nga mao usab ang tema sa paghandum sa buwan paglikay sa sunog.

Niini, gidugang sa BFP nga aduna silay daghang mga aktibidales nga himoon aron pag-awhag sa mga Boholano nga makigtambayayong sa paglikay sa katalagman ilabi na sa sunog.

Kauban niini ang mga seminar, lecture, ug fire drills aron ang mga tawo makahibalo unsaon pagdumala sa sitwasyon kung adunay mahitabo nga sunog.

Ila usab nga ipahibalo ang mga tips aron malikayan ang sunog ug mapatunhay ang kaluwasan sa mga panimalay.

Dinhi usab sa Kapihan, iyang gibalikbalik sa pagpasabut: ang paglikay mahimong labing maayo nga paagi aron halayo sa katalagman ug bisan sa kamatayon. (PIA Bohol/Geriza Necesario, student intern)