TAGBILARAN CITY, Bohol, March 13 (PIA) -- Gibuksan sa Intellectual Property Office of the Philippines (IPOPHL) ang ilang pinakabag-o nga Intellectual Property (IP) Help Desk sa buhatan sa Department of Trade and Industry (DTI)-Bohol Provincial Office nga nahimutang sa FCB Building sa dalan CPG Avenue, ning syudad sa Tagbilaran.

Si Atty. Rowel S. Barba, Director General sa IPOPHL uban nila ni DTI7 Regional Director Maria Elena C. Arbon, DTI7 Assistant Regional Director Hope T. Melgar, DTI-Bohol Provincial Director Maria Soledad L. Balistoy, ug Provincial Administrator Asteria C. Caberte ang nangulo sa gipahigayong Ribbon Cutting Ceremony atol sa paglusad sa Bohol IP Helpdesk sa DTI-Bohol Office Lunes, Marso 13.

Ang IP Helpdesk nagtumong sa pagpataas sa paggamit sa kahibalo sa Intellectual Property (IP) system taliwala sa mga innovator, creator, ug negosyo, ug aron mapanalipdan ang makita nga mga kabtangan pinaagi sa IP registration.

Ang IPOPHL nagpaabot sa pagpausbaw sa kahibalo, apresasyon, ug pagtahud sa intellectual property sa lalawigan sa Bohol.

Si Barba nag-awhag sa tanang stakeholders sa probinsya ug kasikbit nga mga lugar sa pagpahimulos sa mga programa ug serbisyo sa IPOPHL.

Ang IPOPHL usa ka attached o partner nga ahensya sa DTI nga gitahasan sa pagdumala ug pagpatuman sa mga polisiya sa intelektwal nga kabtangan sa gobyerno ug gitukod aron pagpalig-on sa pagpanalipod niini nga mga katungod.

Ang IPOPHL nakigtambayayong sa DTI ug DOST sa pagpalambo sa mga inisyatibo aron suportahan ang pagpalapad sa nagkalain-laing mga innovative nga kalihokan sa nasud. (ECB/PIA7 Bohol)