Sinabi ni Nornita Guerrero, OIC-Provincial Director DTI Occidental Mindoro, na mahalaga ang papel na ginagampanan ng Micro, Small and Medium Enterprises (MSME) sa ekonomiya ng isang lugar.

Nararapat aniya na may tanggapan o ahensya na direktang aagapay sa mga ito upang tulungan silang umunlad na siyang ginagawa ng DTI at SB Corp. Saad ng opisyal, malaki ang pakinabang na nakukuha ng mga MSMEs sa pagtutulungan ng DTI at SB Corp.

“Nagbibigay ang DTI ng mga pagsasanay at iba ipang technical assistance habang ang SB Corp ay nagpapautang ng pondo sa mga nais palawigin o palawakin ang naumpisahang negosyo."

Pangunahin sa mga iniaalok ng ahensya ay ang Pondo sa Pagbabago at Pag-asenso (P3) na ayon kay Ronald Inciong, Department Manager South Luzon Group ay isang lending program o pag-papautang sa mga financing institutions tulad ng bangko at kooperatiba upang ang mga ito ang magpaluwal sa mga kliyente o kasapi. “Prayoridad naming maging partner ang mga kooperatiba,” saad ni Inciong. Aniya, nakatitiyak ang kanilang tanggapan na matutulungan ang mga maliliit na negosyante o mga kasapi na may tunay na pangangailangan.

Dagdag pa ni Inciong, magkakaroon ng ibang option na mahihiraman ang mga negosyante at sa gayon ay maiwasang bumaling sa 5-6 lending scheme, loan shark, o iba pang naniningil ng malaking interes. Karaniwan aniya sa ganito nauuwi ang mga nagtitinda sa mga palengke o pamilihang bayan.