TAGBILARAN CITY, Bohol, April 12 (PIA) -- Kon tinud-on sa kalungsuran ug sa syudad, mahimo na unya nga tinuod ang mandu sa balaod ug ma himong obligado na unya ang mga kalungsuran nga magbukas og Cooperative Development Officer (CDO).

Kini subay sa gilaraw nga lakang sa Sangguniang Panlalawigan  sa Bohol nga paggaray sa usa  ka resolusyon nga mag-aghat sa mga kalungsuran ug sa syudad sa pagmugna og Local Cooperative Development Council (LCDC).

Ang sugyot sa resolusyon, nagasukad sa Republic Act No. 9520, o ang mas nailhang “Philippine Cooperative Development Code of 2008.”

Niini, gitamud sa palisoya ang responsibilidad sa pagpahimugso ug pagpalipang sa mga kooperatiba isip maoy kaluwanan sa pagsalig sa kaugalingon, ngadto na sa pagkab-ot sa ekonomikanhong pag-ugmad ug kaangayan.

Sa balaod, giaghat usab niini ang mga negosyante ug pribadong sector sa paghimo og aktwal nga paghimo og pag-organisa sa mga kooperatiba aron mamugna ang kalikopan nga makapatubo ug makapalig-on sa mga nahisgutang kahugpungan.

Una na nga gipahiluna sa Section 4 (cc) sa Republic Act No. 11364, o ang balaod nga naga palig-on sa Cooperative Development Authority (CDA), ug sa RA 6939, nga naga mugna sa Cooperative Development Authority (CDA), nagpatukod sa cooperative development councils sa nasudnon, rehiyonal, probinsya, syudad ug kalungsuran aron magbutang sa sistema sa konsultasyon sa mga palisiya sa cooperative movement ug sa mga program coordination subay sa giya nga naa sa balaod.

Kini usab napalig-on sa Rule X sa implementing Rules and Regulations (IRR) sa RA 11364, o ang  Cooperative Development Authority Charter of 2019, diin naa didto ang legal basis, tumong, gahum ug mga gimbuhaton, composition ug nga detalye aron mapahimutang ang Cooperative Development Councils.

Sa Bohol, napagawas na ang Executive Order No. 56, Series of 2019, nga nagamandu sa katukoran sa Provincial Cooperative Development Council.

Ug aron kini mapalahutay, gikinahanglan ang aktibo nga local cooperative development councils sa syudad ug kalungsuran aron makarepresentar sa ilang mga kooperatiba sa walay pihig nga partisipasyon, sihag ug accountable ug aron usab makahatag og pundo abag niini mga mga inisyatiba.

Gipahinumdom usab sa SP ngadto sa mga kalungsuran nga ang RA 11535 naglatid nasa pugos nga pagmugna sa posisyon sa Cooperatives Development Officer.  (RAHC/PIA7 Bohol)